Prezidente CLN Gervasio Cardoso de Jesus da silva. Imajen Tatoli/Sérgio da Cruz.

DILI, 10 janeiru 2021 (TATOLI) — Sentru Lojístika Nasionál (CLN sigla portugés) serbisu hamutuk ho Ministériu Finansa (MF) sei halo pagamentu grupu agrikultór 41 iha territóriu nasionál.  

Prezidente CLN, Gervasio Cardoso de Jesus da Silva, informa, grupu agrikultór 41 mai hosi territoriu nasionál, maibe barak-liu hosi munisípiu Bobonaro ho totál grupu 27 ninia kuantidade hare-kulit tonelada 466.

“Ami ho tékniku sira prepara ona sira-nia TIN no tékniku sira hatete fulan ida-ne’e kuandu sistema loke prosesa kedas ba sira-nia konta bankária. Kuandu buat ruma falta CLN fasilita nafatin atubele prosesa pagamentu maibé grupu 17 inklui Maliana ita prosesa ona ba sira-nia konta bankária,” nia informa Agência Tatoli, iha kna’ar -fatin, segunda ne’e.

Prezidente CLN ne’e esplika, hosi grupu agrikultór 41 ne’e iha grupu  31 mak kompleta ona dukumentu no falta grupu 10 mak seidauk.

Dukumentu ne’ebé presiza kompleta mak Billete Identidade (BI) no sertidaun barlakeadu hodi trata TIN, nue’e parte finansa sentral bele halo prosesu pagamentu.

Totál orsamentu ne’ebé atu halo pagamentu ba  grupu 31 ne’e hamutuk $368,012,41 no orsamentu ba grupu agrikultor 10 ne’ebe seidauk kompleta dukumentu ho montante orsamentu $91,045.69 no hosi montante ne’ebé mensiona agrikultór 41 tenke selu taxa ba estadu hamutuk $2,285.73.

“Uluk, regra selu fó direitamente maibé lakuna balun asesór jurídiku finansa sentrál dehan ne’e ilegál. Ida-ne’e mak prosesu fali sira-nia TIN, tanba kualkér atividade negósiu kona-ba osan liga ba estadu nian tenke selu taxa ba estadu,” nia esplika.

Prezidente CLN haktuir, durante ne’e ekipa sira serbisu hamutuk ho parseru Japang International Cooperation Agency  (JICA) sempre halo esforsu atbele aselera  prosesu pagamentu maibé tanba problema liña koordenasaun iha terrenu entre tékniku ho grupu agrikultor sira ladún di’ak implika ba prosesu pagamentu sai atrazu.

“Problema ida-ne’e ha’u prepara de’it dokumentu, osan ne’e finansa mak hatene liu, ne’ebé ha’u-nia ema halo duni serbisu, maibé dalaruma tékniku sira ba iha sira-nia fatin, grupu agrikultór sira laiha, depois fó informasaun la kona malu tamba ida-ne’e mak tarde,” nia katak.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here