Ekipa saneamentu rekolla hela lixu iha Kapitál Dili. Imajen Tatoli/Antonio Gonçalves.

DILI, 11 janeiru 2022 (TATOLI)—Atu prevene moras dengue, Governu liuhosi Autoridade Munisípiu Dili (AMD) husu komunidade halo limpeza iha uma hun sira hanesan bee nalihun iha vazu ai-funan ka roda laran no labele soe fo’er arbiru iha bairru ka aldeia laran.

“Husu ba itania komunidade sira halo limpeza iha uma, hanesan hamoos itania uma hun, hamaran ka hasai hotu bee sira-ne’ebé nalihun iha itania uma hun liuliu iha balde, vazu aifunan, jelera kotuk no roda laran sira. Hosi ne’e, hakoi mós sasán ka lata aat sira-ne’ebé ita bou iha uma hun, atu nune’e labele fó fatin ba susuk atu tolun hodi fó impaktu ba itania saúde. Ho atividade limpeza, bele hadook itania família no oan sira hosi moras dengue,” António Moniz Clau, hateten ba Agência Tatoli, iha nia knaarfatin, Matadouru, Dili, tersa ne’e.

Tuir nia, Autoridade Munisípiu Dili liuhosi ekipa saneamentu esforsu hodi halo sidade Dili sai moos tanba daudaun ne’e Governu koloka ekipa saneamentu kuaze 200-resin no kontrata kamioneta 43 hodi rekolla lixu.

Tanba ne’e husu komunidade atu koopera ho Governu liu-liu asegura nia uma laran tanba sé mak nia uma laran moos ne’e signifika katak nia sei hadook nia família hosi moras dengue.

Notísia Relevante: Kombate dengue, AMD orienta autoridade lokál hala’o limpeza iha kada sesta

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here