Sekertáriu Estadu Juventude no Desportu (SEJD), Abrão Saldanha. Imajen Tatoli/Antonio Dasiparu

DILI, 10 janeiru 2022 (TATOLI)– Sekretáriu Estadu Juventude no Desportu (SEJD), Abrão Saldanha, hateten tinan ne’e, planeia halo estudu viabilidade no dezeñu detalladu (DED, sigla ingles) ba estádiu tolu iha munisípiu kosta súl.

“Iha orsamentu tinan ida ne’e, SEJD prevee iha Fundu Infrastrutura (FI) liuhosi kategoria grande projetu atu halo estudu no dezeñu detalladu ba estádiu tolu tan no salaun multifunsaun ida. Orsamentu ne’e aprovadu ona, ita hein fó termu referénsia ba Ministériu Obra Públika (MOP) no Agência Dezenvolvimentu Nasionál (ADN) haree atu loke konkursu,” SEJD Abrão hateten ba Agência TATOLI iha knaar fatin-Lecidere, segunda ne’e.

Notísia relevante:SEJD deside re-anunsia konkursu reabilita Estádiu Munisipál Dili

Orsamentu ba estudu viabilidade no dezeñu detalladu ne’e hosi Fundu Infrastrutura ho montante $300.000, maibé sei investe uluk $100.000 ba dezeñu, hafoin tama ba konstrusaun.

“Ita haree ba nia prosesu estudu no dezeñu detalladu ne’e kleur uitoan ho nia prosesu aprovizionamentu entaun ita investe uluk $100.000. Tanba orsamentu ba konstrusaun nian bainhira finaliza ona Estudu no dezeñu mak foin hatene loloos totál hira,” nia akresenta.

Tuir planu, estádiu tolu ne’e konstrui iha munisípiu sira parte súl, hanesan Viqueque, Manufahi no Covalima. Nune’e, SEJD kontaktu ona ho Administradór Munisípiu sira atu halo identifikasaun ba rai hodi bele fasilita estudu viabilidade ba estádiu tolu ne’e.

“Ami kontaktu hela ba Administradór Munisípiu Covalima ne’ebé  informa ona mai ami, sira iha ona rai, Manufahi mós rai iha ona no Viqueque mak rai lubuk ida sira sei hare ida ne’ebé mak potensiál atu fó ba ita harii estádiu ne’e, ita haree kuandu rai hirak ne’e mak laiha problema dezeñu ramata ita bele book daudaun ona,” nia afirma.

Timor-Leste iha ona estádiu boot hamutuk haat ne’ebé konstrui ona, hanesan Maliana, Ermera-Gleno, Baucau no Dili inklui Manatuto ne’ebé prosesu konstrusaun atinje ona 83%.

Hosi obra hirak ne’e, konstrusaun estádiu iha Maliana, Ermera-Gleno no Baucau mak hatudu progresu di’ak no utiliza ona.

Kona-ba Estádiu Munisipál Dili, kompañia seidauk finaliza, ne’ebé prosesu haruka fali ba Konsellu Administrasaun Fundu Infrastrutura (KAFI) hodi foti desizaun, atu kontinua konstrusaun.

Notísia relevante: Konstrusaun Estádiu Munisipál Manatuto atinje ona 83%

Jornalista: Hortencio Sanchez

Editór      : Florencio Miranda Ximenes

PUBLISIDADEiklan

1 KOMENTÁRIU

  1. Municipio Manufahi iha ona estádio ida mas sira mak hetan nafatin.
    Municipio Lautém ho município seluk be seidauk hetan n haluha tiha deit.

HAKEREK NO HATÁN

Please enter your comment!
Please enter your name here