Kondisaun ponte Dilor iha postu Lacluta, Viqueque ne’ebé kotu. Imajen/Espesiál

DILI, 10 janeiru 2022 (TATOLI)—Deputada Bankada Kmanek Haburas Nasionál Timor-oan (KHUNTO), Irene Gonzaga Sarmento, husu ba Ministériu Obra Públika (MOP) no Institutu Jestaun Ekipamentu, Institutu Públiku (IGE, I.P, sigla portugés) hodi rezolve ponte Dilor ne’ebé daudaun kotu tanba inundasaun foin lalais.

Ponte Dilor durante ne’e fasilita movimentu populasaun no transporte, ne’ebé hanesan ligasaun postu administrativu Natarbora, munisípiu Manatuto bá postu Lactulata, munisípiu Viqueque.

“Ita-nia ema agora labele liu hosi ponte Dilor tanba kotu. Uluk ponte seidauk kotu maioria povu Viqueque liu hosi ne’ebá, maibé agora labele. Tanba ne’e, ha’u sujere MOP haree ba asuntu ne’e,” Deputada Bankada Governu ne’e informa ba Agência TATOLI, iha resintu Parlamentu Nasionál (PN), segunda ne’e.

Notísia relevante: Xefe suku Dilor husu Governu aselera hadi’a Ponte Dilor

Deputada ne’e nota mós katak, estrada hosi Luka bá Dilór kuaze bee dalan laiha, ne’ebé bee halai tuir nian fatin, nune’e difikulta movimentu transporte públiku.

Iha fatin ketak, Deputadu Partidu Libertasaun Populár (PLP), Albel Pires, hateten, ponte Dilor kotu iha tinan 2018, tanba ne’e MOP presiza prevee orsamentu hodi halo medida permanente, labele aterru de’it.

“Ami husu ministériu halo medida atu labele akontese tan beibeik, tanba povu hosi Viqueque barak mak liu hosi ponte Dilor hodi halo viajen mai Dili,” nia akresenta.

Antes ne’e, Komisaun E ne’ebé trata asuntu infraestutura, relata ona relatóriu fiskalizasaun ba MOP kona-ba ponte Dilor maibé seidauk iha resposta.

Nune’e mós, Deputadu Bankada FRETILIN, Dário Madeira, husu autoridade kompetente atu hadi’a estrada inklui ponte Dilor no Welolo ne’ebé kotu, nune’e bele fasilita movumentu.

“Preokupasaun povu Viqueque durante ne’e mak estrada no ponte Dilor ne’ebé kotu. Ha’u levanta problema ne’e iha plenária kuaze dala-sanulu ona, maibé to’o agora ministériu kompetente seidauk halo intervensaun ruma ba preokupasaun povu Viqueque nian,” Deputadu Bankada Governu ne’e dehan.

Aleinde ne’e, hafoin akontese inundasaun boot iha 04 abríl, Governu halo ona levantamentu ba infraestrutura públika ne’ebé hetan estragu, nune’e bele hetan atendimentu urjente

“Husu MOP no IGE, I.P tenki normaliza lalais ponte Dilor hodi fasilita povu Viqueque,” nia tenik.

Notísia relevante: Ekipa IGE, I.P sei normaliza ponte Dilor semana oin

Antes ne’e, iha novembru 2021, Prezidente Konsellu Administrasaun IGE, I.P, Ermenegilda da Costa Laurentina, hateten ekipa destakadu iha munsípiu sei tun normaliza ponte Dilor no Welolo iha postu Lacluta, tanba hosi parte enjiñeiru institutu foti ona dadus no iha prosesu mobilizasaun ekipamentu.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here