Atividade jogu tradisionál bola guling. Imajen/Espesiál

DILI, 10 janeiru 2022 (TATOLI)—Ministériu Turizmu Komérsiu no Indústria (MTKI) liuhosi Inspesaun Jerál ba Jogu (IGJ, sigla portugés), tuir planu sei estabelese sentru jogu tradisionál iha Kuluhun, Dili, nune’e jogu tradisonál sira-ne’e lábele la’o ilegal no lakon kontrolu hosi Estadu.

Notísia Relevante: MTKI prevee $75.000 hodi kria sentru jogu tradisionál

Inspetór Jerál Jogu, Domingos da Costa, hateten liuhosi jogu ne’e sei rekola reseita di’ak ba Estado no sei kria kondisaun hodi atrai ema seluk hanesan sentru turizmu komunitária no sei monta seguransa, nune’e labarik kiik sira labele asesu ba jogu refere.

“Kona-ba sentru jogu tradisionál tuir loloos iha tinan ne’e, ami ba iha faze implementasaun hodi halo konstrusaun. Tanba ami iha difikuldade iha 2021, kestaun tempu no aplika konfinamentu obrigatóriu no serka sanitária, entaun ekipa tékniku la konsege halo levantementu entaun ami adia. Ba tinan ne’e ami iha prosesu estudu dezeñu planta no kadernu enkargu (BoQ) no 2023 ami sei tau orsamentu. Tuir planu, iha Dili ne’e sei estabelese iha Kuluhun,” Domingos da Costa hateten ba jornalista sira iha nia knar fatin, Bebora, Dili, segunda ne’e. 

Durante ne’e, ekipan Inspetór Jerál Jogu identifika ona fatin atu estabele sentru jogu tradisionál iha Munisípiu Dili sai primeiru pilotu sentru jogu tradiosionál ne’ebé sei estabelese iha Kuluhun no iha munisípiu sira-ne’ebé mak besik fronteira.

“Ami identifika ona iha munisípiu Covalima, Salele, ami nia planu iha ona. Ba parte Leste nian, ami sei instala parte Larigutu, Ossu, Viqueque, tanba fatin istóriku ne’ebé uluk hala’o kontaktu dame iha fatin ne’e,” nia dehan.

Tipu jogu tradisionál sira mak futu-manu, bola-guling, kuru-kuru, soe kelu ne’ebé durante ne’e la’o hetan lukru ne’ebè boot, maibé Estadu la hetan taxa ruma hosi jogu sira-ne’ebè mak bei’ala  sira husik hela ne’e tenke dezenvolve hodi atrai ema seluk.

Kona-ba dezeñu planta no kadernu enkargu (BoQ), SEAK atu halo rekrutamentu ba konsultan ho orsamentu $180. 0000 atu halo levantamento, halo konstrusuan kada projetu ida ni kustu ne’e iha millaun $250.

”Ita hakarak hadi’a sentru ida-ne’e sai sentru ida-ne’ebè mak atu ba turizmu jogu no mós ba komérsiu, ita tenke hadi’a didi’ak para sai sentru turizmu ida,” nia dehan.

Notísia Relevante: Governu sei disemina diploma ministeriál regula jogu tradisionál

Jornalista : Celestina Teles

Editór     : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here