Ministru Obra Públika (MOP), Salvador Eugênio Soares dos Reis Pires. Imajen TATOLI/Francisco Sony

MANUFAHI, 10 janeiru 2022 (TATOLI)—Ministru Obra Públika (MOP), Salvador Eugênio Soares dos Reis Pires, partilla progresu serbisu iha área infraestrutura hanesan estrada, ponte, eletrisidade no bee-moos iha munisípiu Manufahi durante diálogu komunitáriu.

Tuir Ministru, durante ezekusaun projetu ne’ebé ninia orsamentu alokadu iha Fundu Infraestrutura hasoru burokrasia, ne’ebé kada projetu iha interdependénsia ba malu, tanba ne’e dever MOP halo estudu no dezeñu estrada sira ne’ebé planeadu, hafoin haruka ba Ajénsia Dezenvolvimentu Nasionál (ADN) hodi halo verifikasaun.

“Hafoin verifika sei lori ba Konsellu Administrasaun Fundu Infraestrutura (KAFI), ne’ebé lidera hosi Vise Primeiru-Ministru no Ministru Planu no Ordenamentu, José Maria dos Reis, ho membru Konsellu hodi aprova, hafoin ne’e Komisaun Nasionál Aprovizionamentu (CNA, sigla portugés) loke konkursu,” Ministru Salvador hateten iha ámbitu diálogu komunitáriu, iha salaun administrasaun Manufahi, segunda ne’e.

Notísia relevante: Tinan ne’e, MOP kontinua prioritiza reabilitasaun estrada no ponte

Projetu estrada no ponte iha munisípiu Manufahi, iha balun mak daudaun ne’e iha prosesu verifikasaun ADN, nune’e bainhira ramata sei lori ba KAFI hodi hetan aprovasaun no  kontinua ba CNA hodi loke konkursu, ne’ebé bainhira hetan ona manán-na’in mak sei enkamiña ba MOP hodi ezekuta.

Progresu estrada iha kategoria Fundu Infrastrutura ba estrada nasionál, diresaun Aituto-Betano kilómetru 37,25 kompleta ona hosi kilómetu 51,96, no kilómetru 10 trosu Same Luak-Betano inklui ona ba planu 2021, ba estudu viabilidade no dezeñu detallu, ne’ebé daudaun ne iha ona verifikasaun ADN.

Enkuantu, trosu Aiassa-Cassa kilómetru 24,37 sei tau ba estudu tinan tuir mai, trosu Natarbora-Betano kilómetru 48,13, enkuantu hosi totál kilómetru 7,5 inklui ona ba planu estudu viabilidade no dezeñu detaladu iha tinan ne’e no daudun iha ona prosesu verifikasaun ADN,  kilómetru 40,63 sei tau ba estudu iha tinan tuir mai.

Kategoria estrada munisipál, kompostu hosi trosu Turiskai-Alas kilómetru 38k no trosu Wedauberek-Alas kilómetru 21 daudaun iha prosesu verifikasaun finál report hosi AND, trosu Dotik-Fatuberliu-Alas kilómetru 16,25 enkaixa ona ba planu 2021 ba estudu viabilidade no dezeñu detalladu.

Kategoria ponte, iha Ponte Tutuluro, trosu Same Fahi-nehan metru 200, daudaun iha prosesu verifikasaun finál hosi ADN.

Reabilitasaun estrada tinan 2021

Kategoria reabilitasaun estrada, kompostu hosi manutensaun períodika ho totál kilómetru 28,2 no kategoria manutensaun rutina kilómetru 45,65.

Kategoria projetu 143 munisípiu Manufahi, iha projeitu rua mak iha ona kontratu hosi Governu anteriór no projeitu ida mak seidauk iha kontratu.

“Proposta hosi aldeia, suku, postu no munisípiu, tékniku sira kontinua rejista  no ajusta ho planu tinan-15 hosi Diresaun ne’ebé establese ona,” Ministru akresenta.

Estudu viabilidade no dezeñu detallu ba konstrusaun ponte foun mota Kaboska Bemetan Betano ne’ebé inklui iha livru 3A 2021, bazeia ba rezultada verifikasaun hosi ADN finál ona no hetan ona aprovasaun hosi KAFI, sei kontinua submete ba CNA hodi hala’o prosesu Aprovizionamentu.

Liga ho projetu Manutensaun ne’ebé mensiona livru 3B 2021, Roads Maintenance section Jct. Aituto-Same-Betano kilómetru 23, ninia progressu konkursu hosi DNA, manutensaun estrada urbana Same kilómetru 40 (multy year), ninia progressu konkursu mós iha hosi DNA.

Projetu eletrisidade

Kona-ba preokupasaun eletrisidade, Ministru esplika, polítika VIII Governu mak finaliza projetu eletrifikasaun iha dezembru 2023 ba suku 76 ne’ebé seidauk asesu eletrisidade, tanba ne’e daudaun ne’e Eletricidade de Timor-Leste, Empreza Públika (EDTL, E.P) kontinua halo esforsu hodi lansa projetu eletrifikasaun, ne’ebé iha munisípiu Manufahi lansa ona iha suku balun, enkuantu fatin seluk iha munisípiu ne’e sei tuir mai.

Notísia relevante: MOP no EDTL, E.P hatuur ai-riin eletrisidade iha suku Tutuluro Manufahi

Projetu eletrifikasaun nasionál pakote 34 daudaun ninia prosesu finalizasaun kontratu ba manan-na’in sira, ne’ebé sei implementa iha postu Alas, Same, Turiskai, ho ninia trosu sira mak Tateker-Weberek, enkuantu instalasaun foun iha Alas, Letefoho-Rotutu ne’ebé lansa tiha ona iha 2021 konstrusaun hahú hela.

Postu Same fatin balun ne’ebé lansa ona mak Daisua-Grotu, Grotu-Atemua-Mindelu, Dermana suku Liurai, Tohu-Betano to’o Otorita, Transfemuda, Tane no Sesurai, Kasa, Holarua to’o Datina, Karbulau, Erluli, Luak, Ailok Laran-Turun, Tatekar to’o Kledik, Kerin Tetuk, Tiran no Fatuberliu, Dotik to’o Alas.

“Ida-ne’e maka pakote 34 ne’ebé konklui iha tinan 2021, ne’ebé ninia prosesu kontratasaun la’o hela,” Ministru tenik.

Foin lalais EDTL, E.P fó sai lista iha prosesu konkursu mak kompostu hosi Postu Turiskai, Fatuberliu, Alas no Same vila, iha troxu mak, suku Liurai-Orana ne’e instalsaun foun iha Turiskai, Fatukahi-Klakuk instalasaun foun iha Fatuberliu, Alas vila suku Aituha instalasaun foun iha Alas, suku same vila, fatuk nehan-Falitehu, nomós eskola vokasionál nú-laran.

“Restante ne’ebé seidauk halo konkursu, ha’u ko’lia ho Prezidente EDTL, E.P katak sira halo hela levantamentu dadus no planeia iha tempu badak fó sai tarde liu mak marsu 2022, atu nune’e bele konklui liña eletrisidade sira ba suku sira ne’ebé seidauk asesu,” governante ne’e dehan.

Enkuantu, hein liña eletrisidade sira, MOP no EDTL, E.P iha programa eletrifikasaun rurál ne’ebé iha tinan 2019 implementa ho orsamentu $1.000-resin, ne’ebé uma-kain iha postu rua mak hakarak sai benefisiáriu tinan ne’e ba solar panel hodi hein instalasaun fiksu eletrisdidade.

Uma-kain ne’ebé hakarak tama programa ne’e mak hanesan Same-Fatuberli, Klakuk iha aldeia tolu, aldeia Tiru uma-kain-sia, Lalu uma-kain 20, Nanaer 23, Same villa, Holarua iha aldeia tolu mak Aldeia Anelumu uma-kain 41, Balaro uma-kain 25, Deonau uma-kain 27.

Aliende ne’e, Ministru partilla informasaun ba partisipante kona-ba planu mestri ba projetu bee-moos inklui munisípiu Manufahi, inklui atendimentu Institutu Jestaun Ekipamentu (IGE, sigla portugés) iha área afetadu dezastre naturál no loke estrada foun hodi fasilita movimentasaun komunidade.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here