Diretór Nasional Irrigasaun MAP, Martinho Laurentino Soares. Imajen TATOLI/Arminda Fonseca

DILI, 10 janeiru 2022 (TATOLI)–Ministériu Agrikultura no Peska (MAP) iha tinan 2021 konsege hadi’a irrigasaun ida hosi projetu irrigasaun ualu ne’ebé a’at, prevee iha verba kapitál dezenvolvimentu ministériu, ne’ebé hetan ona aprovasaun hosi Komité Revizaun Aprovizionamentu Polítika (KROP) iha tinan 2020.

“Ita foin ezekuta balun tanba atraza iha prosesu konkursu, ne’ebé agora hotu ona to’o tinan 2021 nia rohan, Servisu irrigasaun ita konsege hadi’a ida no sira seluk kontinua iha tinan 2022,” Diretór Nasionál Irrigasaun, Martinho Laurentino Soares, hateten, ba Agência TATOLI, iha ninia knaar fatin, MAP, Comoro, segunda ne’e.

Notísia relevante: Autoridade Viqueque husu MAP hadi’a irrigasaun hodi hasa’e produsaun lokál

Projetu irrigasaun ualu ne’ebé MAP atu hadi’a, antes ne’e iha ona, balun konstrui permanente no balun tradisionál de’it.

“Entaun presiza hadi’a tanba a’at ona no iha loron 04 abríl liubá mota tebe sai hotu, kanu tohar no rai halai, entaun presiza hadi’a no tau fali bronjon atu satan mota labele sobu,” nia akresenta.

MAP konsege hadi’a irrigasaun Raibere iha Ainaro, ho kustu $29.087, maibé foin mak selu 90%, enkuantu pagamentu 10% seidauk tanba falta retensaun ne’ebé presiza hadi’a tan.

“Fulan-janeiru ou fevereiru nia-laran mak bele kompleta 100%, maibé depende mós ba udan,” nia tenik.

Orsamentu ne’ebé prevee hodi hadi’a irrigasaun boot ualu hamutuk $1.613.435,59, ne’ebé ninia ezekusaun foin atinje 24%.

“Orsamentu sira ne’ebé ezekuta la hotu ne’e ita re-aproria ba tinan 2022. Sira ne’ebé seidauk ezekuta MAP garante katak tinan ne’e sei ezekuta hotu tanba fulan-maiu no juñu projetu sira ne’e sei hahú,” Diretór tenik.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here