Primeiru-Ministru-Taur Matan Ruak, hamutuk ho membru Governu balun no Autoridade Manufahi, realiza diálogu komunitáriu iha resintu administrasaun munisipál, segunda (10/01). Imajen TATOLI/Jogerjo Guterres

MANUFAHI, 10 janeiru 2022 (TATOLI)—Governu daudaun ne’e halo hela esforsu ho forma oin-oin atu kombate peska ilegál iha Tasi Timór, hanesan intensifika kontrola no aumenta fasilidade.

“Ró funu rua hosi Austrália sei mai iha tinan 2023, ho kapasidade atu kontrola tasi mane. Nune’e iha tinan 2025 to’o 2026 sira ne’ebé naok ita-nia ikan sei laiha,” Primeiru-Ministru (PM), Taur Matan Ruak, hateten, iha ámbitu diálogu komunitáriu, hodi responde ba preokupasaun komunidade, iha resintu administrasaun munisípiu Manufahi, segunda ne’e.

Tuir Xefe Governu, atividade peska ilegál iha Tasi Timór akontese tanba ema sira hatene país seidauk iha fasilidade adekuadu atu kontrola.

“Uluk Governu sosa ró rua, maibé labele kontrola to’o Kosta Súl,” nia akresenta.

Notísia relevante: Governu autoriza aprovizionamentu ró peska industriál kapasidade 250 GT

Antes ne’e, Governu prevee orsamentu iha tinan 2020 atu sosa ró no aviaun funu hodi bele semo iha tasi leten, maibé orsamentu la pasa iha Parlamentu Nasionál, tanba ne’e la konsege realiza.

“Peska ilegál ne’e hanesan preokupasaun boot, tanba ne’e investimentu ba kombate peska ilegál ita hahú halo no tinan ne’e ita simu aviaun ida hosi Estadu Unidu Amérika (EUA), ne’ebé foin dahuluk harii komponente aéreu no aeroportu Baucau hamutuk no prepara hodi hadi’a aeroportu ne’e atu sira-nia funsaun mak semo hodi kontrola ita-nia tasi sira, tanba Tasi Timór ho Austrália iha ona delimitasaun fronteira mátima no tasi boot, tanba ne’e ita tenke kontrola,” Xefe Ezekutivu dehan.

Laiha fasilidade adekuadu

Iha biban hanesan, Xefe suku Betano, Filipe de Araújo, preokupa ho atividade peska ilegál iha tasi mane ne’ebé kontinua maka’as maski iha membru destakadu FALINTIL-Forsa Defeza Timor-Leste (F-FDTL).

“Vijilánsia ba peska ilegál ne’e importante, iha ona postu Naval iha Betano. Ami kontente tebes maibé susar oituan tanba laiha ekipamentu iha tasi laran atu lori apoia peskadór sira karik hetan buat ruma no mós kontrola peska ilegál baibain liuhosi tasi ne’e, tanba ne’e baibain ami hetan maibé haree de’it,” Autoridade Lokál ne’e haktuir.

Hatán ba kestaun ne’e, Sekretáriu Estadu Peska, Elídio de Araújo, informa, daudaun ne’e Ministériu Agrikultura no Peska (MAP) simu de’it informasaun katak iha atividade peska ilegál maibé labele kombate tanba laiha fasilidade.

“Iha tinan 2021 peska ilegál hamutuk 48, ita só haree de’it, labele halo buat ida tanba ita-nia fasilidade laiha. Maibé tuir orientasaun Primeiru-Ministru katak iha 2021 Governu iha ona planu atubele sosa ró komersiál peska unidade rua no daudaun konsultór sira sei halo hela estudu, hafoin sei aprezenta ba Komisaun Nasionál Aprovizionamentu (CNA, sigla portugés) atu realiza konkursu,” nia garante.

Tinan tolu-nia laran ró ilegál sira ne’ebé tama liuhosi tasi Kosta Súl hamutuk unidade 149.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here