Projetu rekonstruasaun Gabiaun iha mota Noel-Ekat, hetan estragu hosi mota. Imajen espesiál.

OÉ-CUSSE, 10 janeiru 2022 (TATOLI) – Autoridade Rejiaun Administrativa Espesiál Oé-Cusse Ambeno (RAEOA), daudaun ne’e konsulta ona empreza tolu hodi hadi’a fali projetu emerjénsia ba rekonstrusaun Gabiaun ne’ebé konstrui iha tinan 2021, tanba hetan estragu hosi korrenti mota.

Sekretáriu Rejionál ba Asuntu agrikultura, José Eta, informa, projetu gabiaun unidade 19 ne’ebé autoridade konstrui iha tinan 2021, progresu fíziku maioria atinje ona 100%, maibé iha unidade tolu mak hetan estragu iha loron 05 dezembru tanba udan boot.

Nune’e projetu ne’ebé hetan estragu mak hanesan, Gabiaun Noel-Ekat lokaliza iha suku Bobometo, sub-rejiaun Oésilo, ne’ebé ezekuta hosi empreza Zaunar Unipesoál, Lda, ho valór kontratu hamutuk $133,000.29, ho durasaun kontratu loron 120, ho médida metru 500.

Projetu rekonstrusaun gabiaun mota Noa-Ana lokaliza iha suku Lela-Ufe, sub-rejiaun Nítibe, ne’ebé ezekuta hosi empreza Mambuti Unipesoál Lda, ho valór kontratu $51,763.25, ho durasaun kontratu loron 120.

Nune’e mós projetu rekonstrusaun Gabiaun iha mota Nifu-Namanas lokaliza iha suku Ban-Afi, sub-rejiaun Nítibe, ne’ebé ezekuta hosi empreza Jerife-Lalin Unipesoál Lda, ho valór kontratu $18,733.55, ho durasaun kontratu loron 120.

“Iha unidade tolu mak hetan estragu hosi mota, ne’ebé ita ko’alia ona ho empreza sira, balu hatama ona sira-nia karta deklarasaun depois sira sei hadi’a, bainhira udan been menus mak foin bele hahú fali serbisu, tanba autoridade konsulta ona ho tékniku sira hosi diresaun infraestrutura no agrikultura, ba projetu tolu ne’e presiza serbisu fali,” José Eta, informa ba Agência TATOLI, liuhosi telefónika, segunda ne’e.

Autoridade ne’e fó-sai katak, projetu rekonstrusaun gabiaun balu autoridade halo ona pagamentu, maibé iha retensaun ne’e autoridade ko’a 10% ba durasaun tinan ida, nune’e bainhira obra sira-ne’e estragu, empreza bele utiliza osan ne’e hodi hadi’a hikas.

“Seidauk atinje 100%, maka gabiaun Soko, Nifu-Namanas, Noa-Ana, Aenmat, Sonamnasi no Bitopa, ne’ebé obra sira-ne’e bainhira hetan estragu, empreza sira iha obrigasaun hadi’a fali,” nia fó-sai.

Xefe suku Bobometo, José Elo, rekoñese iha tinan 2021 suku Bobometo hetan projetu gabiaun unidade ida iha mota Noel-Ekat, maibé foin udan boot iha dezembru hetan estragu.

“Projetu hetan estragu, mumentu ne’ebÁ ha’u hato’o iha autoridade sira, ne’ebé sei hein bainhira udan-been menus, empreza sei hadi’a fali, tanba obra ne’e seidauk remata,” nia katak.

Nune’e iha setembru 2020, autoridade RAEOA aloka osan millaun $2-resin mai hosi Orsamentu Jerál Estadu (OJE) 2021 ba Sekretaria Rejionál ba Asuntu Agrikultura no Diresaun Rejionál Infraestrutura, hodi konstrui Gabiaun unidade 19 iha sub-rejiaun Oésilo, Pante Makasar no Nítibe.

Intesaun hosi projetu emerjénsia ne’e atu rekupera patrimónia agrikultór sira-nian, atu proteje área produtiva sira hanesan natar, to’os rai-maran inklui to’os modo, tanba hetan hetan estragu iha siklone tropikál seroja iha 04 abríl liubá.

Notisia relevante: Autoridade RAEOA aloka millaun $2-resin ba rekonstrusaun gabiaun

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here