Dezeñu ospitál munisipál Viqueque. Imajen Tatoli/Vitorino Lopes da Costa.

VIQUEQUE, 09 janeiru 2022 (TATOLI)—Diretór Saúde Munisipál Viqueque, Francisco de Carvalho, informa, komunidade Viqueque maioria asesu ona fasilidade saúde, hosi sensu uma-kain tinan 2015 hamutuk 76,033 (64%).

Diretór Saúde Munisipál Viqueque, Francisco de Carvalho. Imajen Tatoli/Jogergo Guterres.

“Sistema saúde nian normalmente bolu vizit/kapita, tuir meta Governu kada tinan tenke atinje vizit/kapita to’o 3, ne’ebé iha tinan 2020 vizit/kapita atinje ona 3.2,  maibé iha tinan 2021 tun ba 1.3 tanba impaktu hosi COVID-19 halo ema hotu tauk ba fasilidade saúde, maibé atu dehan, maioria komunidade Viqueque asesu ona fasilidade saúde,” Diretór  Francisco, hateten ba Agência Tatoli, bainhira partisipa diálogu Governu ho komunidade Viqueque, iha resintu administrasaun munisípiu Viqueque, sábadu ne’e.

Responsável ne’e afirma, tinan 2021 nakonu ho dezafiu tanba hasoru pandemia COVID-19, ne’ebé  fó impaktu boot ba iha prosesu atendimentu públiku liliu iha setór saúde nian ba komunidade, maibé ekipa saúde Viqueque kontinua esforsu fó atendimentu nafatin ba komunidade Viqueque.

Maski, iha tinan 2021 komunidade ladún asesu ba fasilidade saúde tanba tauk COVID-19, maibé ekipa saúde munisípiu realiza fali programa hodi la’o tuir komunidade hanesan vizita saúde família, no aproveita vasinasaun fó mós asisténsia ba populasaun ne’ebé presiza.

Munisípiu Viqueque iha sentru saúde lima, maternidade tolu, postu saúde 43 iha postu administrativu lima mak, Ossu, Lakluta, Uatulari, Uatocarbau, no Viqueque vila.

“Fasilidade saúde sira ne’e haree hosi kuantidade sufisiente maibé intermu kualidade presiza hadi’a buat balun tanba fasilidade barak ne’e balun uza autoridade lokál nia hela fali, utiliza espasu balun hosi uma PNDS nian hodi fó atendimentu ba komunidade, ida ne’e mak esforsu ami halo atu komunidade kontinua asesu,” nia preokupa.

Kona-ba transporte kada postu saúde iha karreta ida no ambulánsia rua, nune’e transporte sufisiente, maibé problema ne’ebé sempre hasoru mak kondisaun estrada tanba estrada aat difikulta tebes atu ambulánsia ba tula moras liuliu iha tempu udan.

“Ami koordena ho komunidade hulan moras ne’e to’o estrada mak ambulánsia tula ba sentru saúde,” nia akresenta.

Tinan ne’e, Saúde Munisípiu Viqueque planu kontinua hadi’a fasilidade saúde liuliu reabilitasaun edifísiu sira, harii armazein aimoruk, sala maternidade iha Ossu, reabilitasaun sentru saúde Uatolari no espansaun sala maternidade sira, konstrui mós postu saúde balun.

“Hanesan daudaun ne’e konstrusaun postu saúde Builale la’o hela, komesa ida pur ida tuir kbiit governu nian, planu halo hela. Orsamentu operasionál alokadu ba saúde Viqueque iha tinan 2022 rihun $100,”nia haktuir.

Profisionál saúde iha Viqueque hamutuk 440, kompostu hosi médiku, infermeiru, infermeira, parteira, aleadu, no pesoál administrasaun.

Jornalista  : Antónia Gusmão.

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here