Traballadór EDTL, E.P halo instalasaun liña eletrisidade iha área Colmera, Dili, segunda (25/10/2021). Imajen TATOLI/António Gonçalves

VIQUEQUE, 08 janeiru 2022 (TATOLI)–Governu liuhosi Ministériu Obra Públika (MOP) kompromete sei dada eletrisidade iha suku sira iha munisípiu Viqueque, ne’ebé seidauk asesu enerjia eletrisidade to’o agora.

“Entre fulan-fevereiru no marsu, sei fó sai pakote datoluk, ne’ebé ba munisípiu Viqueque rasik hosi pakote sira ne’ebé lansa, pakote dahuluk kompostu hosi liña distribuisaun Likibuti-Nahareka hosi Nahareka-Ossu, Tagaba, Tasinaha, Talerisi bá suku Uaibobo-Ossu. Abana Uatumaluli hosi Builo ba Ossu. Abana-Likibuti bá Uaguia-Ossu, no ikus liu mak Uailaek Uareka, Osoroa ba Ossu,” Ministru Obra Públika, Salvador Eugênio dos Reis Soares Pires, informa hodi hatán pergunta sira hosi Autoridade lokál, iha ámbitu diálogu komunitáriu, iha administrasaun Viqueque, sábadu ne’e.

Iha suku 76 ne’ebé seidauk asesu liña eletrisidade, foin lalais Governu liuhosi Eletricidade de Timor-Leste, Empreza Públika (EDTL, E.P) halo ona lansamentu pakote dahuluk hamutuk 34 no pakote daruak 44.

Notísia relevante: EDTL introdús projetu eletrifikasaun pakote 44 ba empreza interesadu

Pakote 34 nia rezultadu aprovizionamentu sai ona no agora iha prosesu kontratasaun no 44 iha hela prosesu avaliasaun.

Nune’e, pakote 78 ne’e halo kobertura ba suku 55 hosi suku 76 ne’ebé seidauk asesu enerjia eletrisidade, enkuantu restu hamutuk 21, EDTL, E.P halo hela planu atu nune’e konklui, hodi halo preparativu ba prosesu aprovizionamentu no fó sai konkursu públiku.

“Kontratasaun la’o hela, iha tempu badak sei finaliza prosesu administrativu ne’e, empreza halo mobilizasaun no komesa ona instalasaun,” Ministru akresenta.

Pakote 44 ne’ebé nia prosesu avaliasaun la’o hela, konkursu ne’ebé fó sai ona mak hanesan ba munisípiu Viqueque, hosi Kamidar bá Luhan rai koak-Lalini, Lalini-Lakluta, Ossu-Liaruka, Liaruka-Ossu, Lalini-Ahek, Ahek-Lakluta, Dilo-Lalerek mutin, Bibileo-Viqueque villa, Osowake-Uamori, Uaimori-Viqueque villa.

Notísia relevante: MOP lansa projetu eletrifikasaun iha suku Rairobo

“Ida-ne’e ba munisípiu ne’ebé daudaun halo hela konkursu. Atu fó hatene katak hosi suku 36, iha suku 28 mak asesu ona no ualu iha aldeia 74 mak seidauk asesu, espera katak prosesu administrativu halo hotu, bele avansa ona implementasaun iha tempu badak. Kompromisu Governu mak halo hotu iha tinan 2023 nia rohan, tanba ita-nia kobertura hamutuk 89% iha territóriu tomak, restante ne’e ita hakarak iha dezembru 2023 bele konklui ona,” Ministru otimista.

Iha tinan 2019, bainhira populasaun sira levanta kestaun eletrifikasaun, Governu argumenta katak tama ona iha planu hotu, maibé seidauk bele realiza tanba mosu impase polítika no razaun seluk atrazu iha implementasaun tanba sistema burokrasia rasik.

“Tanba ne’e, polítika Governu reforma EDTL sai empreza públika hodi iha autonomia finanseira, administrativa judisiária atu habadak burokrasia,” governante ne’e dehan.

Suku rua iha postu Lacluta seidauk asesu liña eletrisidade

Iha biban hanesan, Administradór postu Lacluta, José Andrade dos Santos, hateten, iha suku rua iha postu ne’e mak seidauk asesu liña eletrisidade.

“Durante ne’e orientasaun katak kada suku hala’o serbisu tenki uza komputadór, maibé realidade suku balun izoladu tanba ahi laiha. Tanba ne’e husu atu dada ahi iha tinan ida ne’e tanba iha postu Lacluta, iha suku Lalini no Ahik mak seidauk asesu ahi,” nia informa.

Postu Administrativu Lacluta iha suku haat hanesan Ahik, Uma Tolu, Laline, no Dilor.

Nune’e mós, Xefe suku Uaimori, postu administrativu Viqueque villa, Francelino António Gomes, akresenta, suku ne’e desde Timor-Leste ukun-an iha tinan 2002 to’o agora seidauk asesu liña eletrisidade.

“Suku Uaimori, hanesan fatin ikus ba konsentrasaun FALINTIL nian, to’o agora seidauk asesu liña eletrisdade,” Líder komunitáriu hato’o preokupasaun.

Munisípiu Viqueque kompostu hosi postu administrativu Lima hanesan Viqueque villa, Lacluta, Uatulari, Uatucarbau, no Ossu.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here