Sekretáriu Jerál no Atuál Deputadu (UDT), Francisco David Xavier Carlos. Imajen/Egas Cristóvão.

DILI, 07 janeiru 2022 (TATOLI)—Prezidente Repúblika, Francisco Guterres ‘Lú-olo’, rona Partidu Uniaun Demokrátiku Timorense (UDT) hodi fó opiniaun eleisaun prezidensiál iha tinan ne’e hafoin dekreta kalendáriu eleisaun.

Notísia Relevante: PR sei dekreta kalendáriu eleisaun hafoin rona partidu polítiku sira

“Iha enkontru no konsultasaun ho Prezidente Republika ne’e, tuir planu, iha tempu badak ne’e Xefe Estadu sei dekreta kalendáriu Eleisaun prezidensiál,” Sekretáriu Jerál Partidu Uniaun Demokrátiku Timorense (UDT), Francisco David Xavier Carlos, hateten ba jornalista sira hafoin ramata hala’o sorumutu ho Xefe Estadu iha Palásiu Prezidensiál Nicolau Lobato, Bairru Pite, Dili, sesta ne’e.

UDT louva Xefe Estadu durante tinan lima hala’o knar mezmu ho dezafiu barak maibé PR hatudu nu’udar aman ba nasaun no tuir konstituisaun to’o tinan lima ona, tenke halo eleisaun nune’e UDT husu PR no fiar desizaun ne’ebé foti hanesan ema hotu nia hakarak.

Opiniaun hosi UDT kona-ba kalendáriu mak hanesan ho PR nian sei dekreta iha tempu badak, maibé ne’e kompeténsia tomak iha Prezidente Repúblika nia liman.

Durante sorumutu, Xefe Estadu hato’o apresiasaun boot ba partidu UDT kona-ba nia postura polítika durante ne’e perante iha Parlamentu Nasionál tau tuir karáterístika sentru moderadu interese povu maiória Timor-Leste nian.

Nia dehan, kona-ba kandidatu no apoiu figura ruma iha eleisaun ne’e sei liu hosi kompeténsia Konsellu Superiór Polítiku partidu nian iha konferénsia nasionál mak sei foti desizaun, tanba ne’e sei hein PR dekreta kalendáriu eleisaun.

Maibé, Tuir nian, UDT hakarak Prezidente Repúblika ida-ne’ebé bele hodi Timor-Leste ba oin ho situasaun dezafiu barak ne’ebé ohin loron hasoru bele sai hosi sirkulu ida-ne’e no lori Timor-Leste tenke ba oin.

Notísia Relevante: Kaleidoskópiu 2021: tinan polítika no preparasaun eleisaun prezidensiál 2022

Enkuantu, to’o sexta ne’e, Prezidente Repúblika rona ona opiniaun hosi partidu asentu maiória Parlamentár iha kinta lejislatura kompostu hosi, Partidu Demokrátiku (PD), Partidu Frente Mudansa (FM), partidu Frente Revolsionáriu Indepedente (Fretilin), partidu Kmanek Haburas Unidade Nasionál Timoroan (KHUNTO), partidu Kongressu Nasionál Rekonstrusaun Timorense (CNRT, siglá portugés), partidu Dezenvolvimentu Demokrátiku (PUDD), Partidu Libertasaun Populár (PLP) ho partidu Uniaun Demokrátiku Timorense (UDT).

Tuir artigu 12 husi lei númeru 7/2006, 28 dezembru, ho alterasaun susesiva ba lei ne’e, Prezidente Repúblika tenke rona uluk Governu no partidu polítiku ho asentu iha Parlamentu Nasionál, molok dekreta data eleisaun ba Prezidente Repúblika.

Molok halo enkontru ho líder partidu sira, Prezidente Repúblika rona ulu tiha ona Governu, liuhusi Primeiru-Ministru, Taur Matan Ruak no Ministru Administrasaun Estatál, Miguel Carvalho.

Nune’e mós, Prezidente Repúblika rona mós Komisaun Nasionál Eleisaun (CNE) no Sekretáriadu Tékniku Administrasaun Eleitorál(STAE) kona-ba preparativu ba eleisaun prezidensiál 2022.

Notísia Relevante: UDT laiha kandidatura kompete iha eleisaun prezidensiál 2022

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here