Sekertariu Estadu Formasaun Profisionál Empregu (SEFOPE), Alarico do Rosário. Imajen TATOLI/Francisco Sony

DILI, 07 janeiru 2022 (TATOLI)–Sekretaria Estadu Formasaun Profisionál no Empregu (SEFOPE), sesta ne’e, realiza atividade avaliasaun dezempeñu serbisu durante tinan 2021.

Tuir Sekretáriu Estadu Formasaun Profisionál no Empregu, Alarico do Rosário, objetivu atividade ne’e atu haree serbisu hosi programa, nune’e bele hatene dezafiu no susesu.

“Nune’e ita bele hatene dezafiu sira no bele hadi’a iha tinan 2022 ho atividade no programa,” Sekretáriu Estadu hateten ba Agência TATOLI, iha salaun Katedrál.

Notísia relevante: PN aprova OJE 2022 millaun $4,8 ba SEFOPE

Atividade no programa ne’ebé SEFOPE hala’o durante tinan 2021, laiha dezafiu boot maibé atividade balun labele atinje ho di’ak tanba situasaun COVID-19.

“Hanesan formasaun hasa’e kapasidade funsionáriu sira mak labele ezekuta ho di’ak tanba situasaun COVID-19 ema labele halibur malu liu na’in-sanulu, tanba ita ko’alia kona-ba formasaun presiza halibur ema barak,” nia akresenta.

Nune’e, governante ne’e iha esperansa tinan 2022 situasaun bele di’ak hodi ezekuta programa sira ho di’ak.

“Iha situasaun normál nia laran ita hakarak prosesu serbisu la’o tuir meta ne’ebé ita mehi, liuliu kapasitasaun funsionáriu sira, tanba ita-nia objetivu mak hasa’e abilidade rekursu umanu,” nia tenik.

Orsamentu tinan 2022 ba SEFOPE ho montante $4.815.221, ne’ebé aloka ba saláriu no vensimentu $1.952.772, bens no servisu $1.849.139, tranferénsia públika $1.013.310, kapitál menór no kapitál dezenvolvimentu laiha.

Orsamentu ne’e atu finansia ba programa haat mak hanesan dezenvolvimentu rurál no urbana $450.718, boa governasaun no jestaun institusionál $1.437.916, igualidade jéneru no inkluzasaun sosiál $19.155 no diversifikasaun ekonómika $2.907.432.

Hosi orsamentu hirak ne’e aloka mós ba kada diresaun munisipál hanesan Baucau $37.178, Bobonaro $48.776, Manufahi $37.724, Covalima $43.672, Viqueque $28.451, Aileu $39.712, Ainaro $39.300, Ermera $41.582, Lautém $31.098, Liquiçá $31.644, Manatuto $33.945 no Dili $37.636.

Jornalista : Arminda Fonseca

Editora      : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here