Ministra Saúde, Odete Maria Freitas Belo. Imajen TATOLI/Francisco Sony

LAUTÉM, 07 janeiru 2022 (TATOLI)–Ministra Saúde (MS), Odete Maria Freitas Belo, bolu atensaun populasaun Lautém hodi kuidadu ho moras dengue, maski sentru saúde iha rejiaun ne’e rejista kazu dengue haat de’it maibé nafatin vijilánsia.

“Ha’u hakarak uza oportunidade ida-ne’e hodi fó alarma katak daudaun ne’e iha Dili ita iha surtu dengue, númeru kazu ne’e kiik maibé númeru mate aumenta kompara ho tinan 2020, ne’ebé númeru kazu barak maibé nível kazu ne’e kiik. Entaun hakarak alerta iha Lautém no daudaun ami halo hela preparasaun kona-ba fumigasaun,” Ministra deklara bainhira akompaña Xefe Governu halo diálogu komunitáriu, iha Merkadu Lama, postu administrativu Lospalos, munisípiu Lautém, sesta ne’e.

Notísia relevante: Númeru dengue aumenta, HNGV la iha spasu

Tuir governante ne’e, prevensaun ba moras dengue simples, iha ámbitu udan tenke badinas hamoos uma-hun, hasai bee nalihun iha vazu aifunan no halo limpeza jerál atu nune’e susuk labele hela iha fatin hirak ne’e.

Ba kestaun ne’e, MS planeia atu halo fumigasaun no abatisaun jerál, ne’ebé la’ós kobre de’it iha fatin afetadu dengue, maibé hakarak fatin hotu, tanba ne’e husu ba populasaun atu tau lixu iha fatin.

“Tenki hatene uluk lai karaterístika susuk dengue nia ne’e saida, tanba susuk dengue ne’e gosta tolun iha bee ne’ebé mak moos no gosta tata iha tempu loron, ida tata kalan ne’e susuk malaria nian, maibé felizmente kazu malária zero,” nia akresenta.

Iha biban hanesan, Administradór Postu Tutuala, Ângelo de Araújo, preokupa tebes tanba tempu udan susuk mosu barak, tanba ne’e nia parte husu ba MS atu halo prevensaun sedu molok mosu kazu dengue barak liután

“Husu ba Ministériu Saúde bele preokupa ho COVID-19, maibé dadaun ne’e tempu udan susuk barak, ne’ebé provoka hamosu moras dengue.Tanba ne’e husu karik iha posibilidade ita halo fumigasaun ba ita-nia fatin hodi evita susuk barak liután”, Autoridade postu ne’e preokupa.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here