Eskola Koléjiu Imaculada Conceição Ermera sai manan-na’in kompetisaun jornál parede, iha salaun Xanana Reading Room, sesta (07/01). Imajen TATOLI/Francisco Sony

DILI, 07 janeiru 2022 (TATOLI)–Eskola Ensinu Sekundáriu Koléjiu Imaculada Conceição Ermera sai manan-na’in iha kompetisaun hakerek jornál parede kona-ba istória moruk hosi tinan 1974 to’o 1999.  

Estudante eskola Koléjiu Imaculada Conceição Ermera, Tiago Martins Soares, hateten, sira halo ona preparasaun ba eventu ne’e durante fulan-ida, hahú hosi loron 04 dezembru 2021 to’o 04 janeiru 2022.

Estudante hosi Eskola Koléjiu Imaculada Conceição Ermera, Tiago Martins Soares. Imajen TATOLI/Francisco Sony

“Atividade ne’ebé prepara maka buka autór ne’ebé iha ligasaun ho istória moruk sira hosi 1974 to’o 1999, hodi halo entrevista. Maski enfrenta difikuldade maibé la todan, iha fasilidade telefone android hodi halo entrevista no hasai foto fontes sira,” Tiago Martins, hateten iha Xanana Reading Room, Bidau Lecidere, sesta ne’e.

Aleinde ne’e, difikuldade ne’ebé enfrenta mak iha prosesu hakerek tanba presiza iha ema ruma atu halo korresaun, maibé buat hotu la’o di’ak tanba eskola prepara ona grupu korresaun ida no ikus bele lori rezultadu sira mai aprezenta iha kompetisaun.

Nune’e, Tiago husu nia kolega estudante sira iha territóriu nasionál atu buka envolve-an iha eventu sira hanesan ne’e hodi hatene liután istória rai no ba kolega sira ne’ebé maka kompete, atu nafatin haka’as-an hodi bele hetan oportunidade iha tempu tuir mai.

Koordenadór Operasionál Xanana Reading Room, Manuel Elizeu Ribeiro Soares. Imajen TATOLI/Francisco Sony

Iha biban hanesan, Koordenadór Operasionál Xanana Reading Room, Manuel Elizeu Ribeiro Soares, relata, fontes ne’ebé estudante sira tenke entrevista hanesan ema baibain, la’ós líder nasionál sira.

“Ita-nia orientasaun buka autór sira ne’ebé envolve iha istória moruk sira, ne’ebé ema nunka koñese sira, atu nune’e ita bele hetan fali istória foun,” nia akresenta.

Molok estudante sira atu partisipa iha kompetisaun, sira hetan ona orientasaun no sosializasaun iha ida-idak ninia eskola, nu’udar bukae ida atu fasilita iha prosesu entrevista ho fontes.

Reprezentante Ekipa Juri Kompetisaun Jornál Parede, Zevonia Vieira. Imajen TATOLI/Francisco Sony

Enkuantu, Reprezentante juri Zevonia Vieira, orgullu tanba iha kompetisaun ba eskola sira hosi munisípiu, ne’ebé hatudu kreatividade boot liu tanba sira maka okupa pozisaun dahuluk.

“Eskola sira iha munisípiu hatudu prosesu dezenvolvimentu edukasaun di’ak. Husu koordenadór sira hosi parte Xanana Reading Room atu kontinua nafatin eventu sira hanesan ne’e hodi fó espasu ba estudante sira iha Timór laran tomak, bele espresa kreatividade liuhosi jornál parede ne’e,” nia enkoraja.

Reprezentante Juri Kompetisaun Jornál Parede, Xisto Freitas, entrega prémiu sestu lugár hosi Eskola Sekundária Laulara, iha salaun Xanana Reading Room, sesta (07/01). Imajen TATOLI/Francisco Sony

Estudante Ensinu Sekundáriu jerál no privadu ne’ebé partisipa iha kompetisiaun hakerek jornál parede ne’e hamutuk na’in-24, hosi eskola lima iha munisípiu tolu, kompostu hosi Dili iha Eskola Ensinu Sekundáriu Anuur no São Miguel Arcanjo, Ermera iha Eskola Ensinu Sekundáriu Nino Konis Santana no Eskola Koléjiu Imaculada Conceição no Aileu ESJ No 1 Laulara.

Ho nune’e, eskola ne’ebé sai manan-na’in iha kompetisaun ne’e hanesan Eskola koléjiu Imaculada Conceição Ermera okupa primeiru lugar ho valór 1.310, Eskola Ninu Konis Santana Ermera okupa segundu lugar ho valór 1.090 no Eskola Koléjiu São Miguel Arcanjo okupa terseiru lugar ho valór 1.015.

Eskola Anur hosi grupu B okupa kuartu lugar, ho valór 790, kintu lugar nafatin hosi eskola Anuur grupu A, ho valór 710 no  eskola Laulara okupa sestu lugar ho valór 690.

Jornalista : Tomé Amado

Editora     : Julia Chatarina 

PUBLISIDADEiklan

HAKEREK NO HATÁN

Please enter your comment!
Please enter your name here