Terseiru Vise Prezidente Komisaun Polítika Nasionál (CPN, siglá portugés) Partidu CNRT, Tomás do Rosário Cabral, hamutuk ho estrutura hala’o enkontru ho Prezidente Repúblika, Francisco Guterres Lú Olo, hodi rona no fó hanoin kona-ba preperasaun eleisaun prezidensiál, iha Palásiu Prezidensiál Nicolau Lobato, Bairru Pite, Dili, tersa (07/01). Imajen Tatoli/Egas Cristovão.

DILI, 07 janeiru 2022 (TATOLI)—Prezidente Repúblika, Francisco Guterres ‘Lú-olo’, sesta ne’e kontinua rona partidu Kongressu Nasionál Rekonstrusaun Timorense (CNRT, siglá portugés) nia hanoin kona-ba eleisaun prezidensiál 2022 hafoin sei dekreta kalendáriu eleisaun.

Terseiru Vise Prezidente Komisaun Polítika Nasionál (CPN, siglá portugés) Partidu CNRT, Tomás do Rosário Cabral, hateten CNRT nia pozisaun ida de’it mak Prezidente atu marka loron ba eleisaun prezidensiál hodi kumpre ba konstitusaun haruka.

Notísia Relevante: Kandidatu PR: CNRT iha figura rasik no bele ho ema independente

Vise-Prezidente CNRT, Tomás do Rosário Cabral. Imajen Tatoli/Egas Cristóvão.

“Ami hosi partidu CNRT mai hasoru Prezidente Repúblika tanba hetan konvite ba konsulta no ami hato’o ba Prezidente pozisaun CNRT mak ida de’it marka loron eleisaun prezidensiál no kumpre buat ne’ebé mak iha,” Terseiru Vise Prezidente CPN ne’e hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, Dili.

CNRT maduru ba politíka no garante pás ho estabilidade iha prosesu aktu eleitorál hotu no CNRT nu’udar pilár polítiku partidu ka Estadu nian prezensa atu kontibui ba markasaun kalendáriu eleisaun.

Kandidatu Prezidente Repúblika nian, nia dehan, CNRT iha estatutu rasik ne’ebé liuhosi konferénsia no kongresu mak sei deside bainhira Xefe Estadu dekreta ona kalendáriu nune’e preparadu atu kompete iha eleisaun.

Entertantu, sorumutu PR ho partidu CNRT ne’e akompaña mós hosi membru CPN CNRT hanesan Bendito Freitas, Xefe Bankada no Vise CNRT iha Parlamentu Nasionál, Duarte Nunes no Patrocínio Fernandes.

PR rona PUDD nia hanoin

Entretantu Prezidente Repúblika, Francisco Guterres Lú Olo, rona mós Partidu Dezenvolvimentu Demokrátiku (PUDD) nian kona-ba preparasaun eleisaun prezidensiál 2022.

Prezidente Komisáriu Polítika Nasionál (KPN), Silvestre Xavier Sufa. Imajen Tatoli/Egas Cristóvão.

“PUDD hetan konvite hosi Prezidente Repúblika hodi rona informasaun kona-ba preparasaun eleisaun prezidensiál. PUDD laiha objesaun hodi fó apoiu ba Xefe Estadu nia hanoin kona-ba eleisaun,” Prezidente Komisáriu Polítika Nasionál (CPN), Silvestre Xavier Sufa, hateten hafoin ramata enkontru ho Prezidente Repúblika.

PUDD hanesan partidu polítiku preparadu ba tuir eleisaun ne’e, maibé PUDD seida’uk deside nia kandidatura atu kompete iha eleisaun prezidensiál, tanba sei organiza no estabelese partidu iha baze ho di’ak nune’e sei hein desizaun konferénsia mak deside atu apoiu kandidatu hosi partidus eluk ka avansa ho kandidatu rasik.

Notísia Relevante: PUDD sei deside kandidatura PR iha konferénsia nasionál

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here