Prezidente FFTL, Francisco Jerónimo. Imajen TATOLI/Francisco Sony

DILI, 06 janeiru 2022 (TATOLI)–Prezidente Federasaun Futeból Timor–Leste (FFTL) Francisco Jerónimo, hateten, suspensaun ba Sekretáriu Jerál (SekJer), Nelio Isaac Sarmento, hodi hadi’a problema internu balun no desizaun ne’ebé foti bazea ba artigu 41 estatutu FFTL nian.

”Sekretáriu  Jerál  nia mandatu seidauk hotu, suspende tanba sistema prosesu iha federasaun ne’e kuandu atu hadi’a, kompeténsia Prezidente nian atu halo, tanba ne’e mak suspende lai atu haree prosesu tuir mai,” Prezidente FFTL ne’e hateten ba Agência TATOLI, iha edifisiu FFTL-Dili, kinta ne’e.

Kompeténsia prezidente FFTL tuir estatutu iha artigu 41 alinea 2c haktuir servisu sekretáriu jerál hetan supervizaun hosi prezidente. Enkuantu alinea 3 esplika prezidente mak bele propoin ba nomeasaun no destituisaun SekJer.

Nune’e, Prezidente FFTL fó ona  kompeténsia ba Adjuntu Sekretariu Jerál, Frederico Martins, mak assume kargu hanesan SekJer en-ezersísiu hodi hein desizaun.

“Agora servisu hotu provizóriu adjuntu mak sei halo hela, buat hotu la’o di’ak hela”,  eis Prezidente Assosiasaun Futeból Munisípiu Liquiça ne’e afirma.

Ho razaun hirak ne’e, jornalista TATOLI hakbesik án ba Nelio Isaac Sarmento hodi konfirma, razaun suspensaun maibé rejeita fó komentáriu.

Tuir observasaun, Nelio Isaac Sarmento nafatin hala’o servisu iha nia  edifísiu FFTL.

Entretantu, Nelio Isaac hetan fiar hosi Francisco Jerónimo iha 2018 bainhira manán iha kongresu ne’ebé  hala’o iha Novo Turizmu Dili.

Francisco Jerónimo eleitu ba Prezidente liuhosi kongresu ne’ebé hili hosi assosiasaun futeból iha munisipiu 13, asosiasaun futeból femenina no asosiasaun arbitrajen.

Francisco Jerónimo manán ho votus 11 bainhira kompete ho adversáriu membru ezekutivu FFTL, Filomeno Fernandes, ho votus tolu no Osorio Florindo mós votus tolu.

Ezekutivu atuál iha FFTL mak Francisco Jerónimo hanesan prezidente, Falur Rate Laek hanesan vise prezidente, Germano da Silva nu’udar segundu vise prezidente no Aleixo da Silva Gama hanesan terseiru vise prezidente, no sekretáriu jerál ne’ebé hetan ona suspensaun mak Nelio Isaac Sarmento.

Jornalista: Hortêncio Sanchez

Editór      : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here