Abitante iha mota-ibun Ponte Comoro III sai vitima ba impaktu inundasaun iha domingu (04/04). Imajen TATOLI/António Gonçalves.

DILI, 06 janeiru 2022 (TATOLI)—Governu liuhosi Autoridade Munisípiu Dili husu abitante sirea-ne’ebé hela iha área risku dezastre atu kuidadu an bainhira akontese udan no anin boot.

“Husu ba komunidade sira-ne’ebé hela iha área risku atu atensaun no kuidadu an bainhira ita tama iha situasuan ida-ne’ebé perigozu hanesan udan no anin boot, tanba ita antesipa di’akliu duké rezolve iha situasaun defisil. Tanba ne’e, husu ba komunidade bainhira haree situasaun perigozu asegura rasik itania an,” Sekretariadu Prezidente Autoridade Munisípiu Dili, António Moniz Clau, hateten ba Agência Tatoli, iha nia knaarfatin, Matadouru, Dili, kinta ne’e.

Iha fulan-jullu 2021, Autoridade Munisípiu Dili liuhosi Autoridade Komunitária halo ona sensibilizasaun ba komunidade sira atu fó hanoin katak haree referénsia ba kotuk hanesan iha 2020 no 2021 ne’ebé tama iha kalamidade kuaze labele rezolve.

“Entaun, ita fó hanoin ba itania maluk sira, liu-liu sira-ne’ebé hela iha mota ninin, fohololon no tasi ibun atu sira kuidadu sirania aan,” nia katak.

Tanba, Dekretu Lei númeru 33/2008 bandu totál komunidade atu labele hela iha fatin risku hanesan mota ninin, fohololon no tasi ibun, tanba bele tau risku ba sirania an.

“Ida-ne’e mak itania komunidade Dili nia karákter, nunka atu rona itania autoridade sira no ikus mai bainhira akontese ona itania Governu liu-liu Munisipiu Dili mak rona lia. Tanba ne’e, ita hatun ona orden ba itania Autoridade Komunitáriu sira atu nafatin hato’o informasaun ba komunidade sira relasaun ho situasaun urjente, hanesan tempu udan no anin boot, atu nune’e sira bele prepara sirania an bainhira akontese buat ruma, sira bele evakua ba fatin ne’ebé seguru,” nia informa.

Konaba komunidade hira mak hela iha fatin risku, nia hateten, hosi sensibilizasaun seidauk iha dadus maibé hosi sensibilizasaun bele hatene no deteta abitante sira-ne’ebé hela iha área risku hanesan hela iha mota Comoro nia ninin.

“Iha mota Comoro nia ninin tun ba, ita hateten ba Autoridade Komunitária sira atu fó hatene ba komunidade atu labele harii tan uma iha mota ninin maibé ba sira-ne’ebé harii ona hein Governu sentrál nia planu oinsá atu konsidera sira ba fatin ne’ebé seguru, inklui ba sira-ne’ebé iha fohololon sira-nbe’e,” nia afirma.

Entretantu, tuir dadús ikus hosi Ministériu Administrasaun Estatál (MAE) relata katak, família hamutuk 2.558 mak dadaun hela iha área risku dezastre naturál iha munisípiu Dili ne’ebé hela besik mota ninin, fohololon no lagoa ninin.

Notísia Relevante: MOP identifika estragu 117 impaktu hosi dezastre naturál

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here