Sekretária Jerál Adjunta Partidu Frente Revolsionáriu Indepedente (Fretilin), Cipriana da Costa Perreira, hamutuk ho estrutura sira hala’o enkontru ho Prezidente Repúblika (PR), Francisco Guterres ‘Lú- Olo’, hodi fó opiniaun kona-ba kalendáriu eleisaun. Imajen Tatoli/Egas Cristóvão.

DILI, 06 janeiru 2022 (TA TOLI)—Sekretária Jerál Adjunta Partidu Frente Revolsionáriu Indepedente (Fretilin), Cipriana da Costa Perreira, hateten iha enkontru ne’e aleinde Prezidente Repúblika rona hanoin kona-ba kalendáriu eleisaun, PR mós preokupa ho variante Omicron iha eleisaun prezidensiál 2022.

Notísia Relevante: FRETILIN preparadu kompete iha eleisaun prezidensiál 2022

Nia hateten, Fretilin fó ninia opiniaun balun prinsipál durante iha aktu eleitorál eleisaun prezidensiál hahú hosi kampaña to’o eleisaun saida mak ita presiza prevene liliu ho situasaun Covid-19 tanba prosesu demokrásia ne’e sei halibur ema barak., nune’e tenke halo prevensaun hodi haree ba povu nia saúde.

Sekretária Jerál Adjunta Partidu Frente Revolsionáriu Indepedente (Fretilin), Cipriana da Costa Perreira. Imajen Tatoli/Egas Cristóvão.

“Importante Prezidente Repúblika nia preokupasaun bele hato’o ba partidu polítiku inklui Fretilin hodi bele hato’o ba ninia militante bainhihra partisipa iha aktu eleitorál hotu kumpre nafatin regra prevensaun COVID-19 tuir Organizasaun Mundiál Saúde nian,” Sekretária Jerál Adjunta Fretilin, Cipriana da Costa Perreira, hateten ba jornalista sira hafoin ramata enkontru ho Xefe Estadu iha Palásiu Prezidensiál Nicolau Lobato, Bairru Pite, Dili, kinta ne’e.

Prezidente Repúblika rekomenda presiza tau atensaun liga ba situasaun COVID-19 atu mantein regra Ministéiru Saúde no OMS hanesan uza máskara, fase liman ho sabaun, distánsiamentu sosiál no simu vasina hodi aumenta imunidade luta kontra virus, nune’e sidadaun hotu bele  kontribui.

Hosi enkontru ne’e mai ho ajenda ida de’it mak fiksasaun kalendáriu ba eleisaun prezidensiál,  ne’ebé Prezidente Repúblika uza nia kompeténsia atu konvida partidu polítiku ne’ebé hetan asentu iha Parlamentu Nasionál ne’e atu partilla nia hanoin relasiona ho aktu eleitorál ne’ebé sei organiza.

Notísia Relevante: Prezidente Repúblika husu partidu polítiku kontribui estabilidade iha eleisaun prezidensiál

Sekretária Jerál Adjunta Fretilin ne’e hateten, bainhira Xefe Estadu dekreta ona kalendáriu eleisaun konserteza Fretilin iha nia referénsia balun atu fó nia apoiu kandidatura hodi kompete iha eleisaun maibé sei liuhosi sorumutu nivél partidu nian mak sei deside.

Entertantu, iha enkontru partidu Fretilin ho Xefe Estadu akompaña hosi kuadru no membru Komite Sentrál Fretilin hanesan, Adjuntu Sekretáriu Jerál Fretilin, Flávio Maria Guterres da Silva, Aniceto Longuinhos Guterres Lopes, David Dias Mandati ho seluk tán.

PR rona opiniaun hosi partidu Frente Mudansa  

Aleinde ne’e, Prezidente Repúblika, Francisco Guterres ‘Lú-Olo’ rona mós opiniaun hosi  Prezidente Interinu Partidu Frente Mudansa (FM), Egidio de Jesus, ho nia estrutura sira.

“Iha ajenda uníka ho Prezidente Repúblika konvida partidu polítiku hotu asentu parlamentár nune’e Prezidente konvoka reuniaun ho partidu Frente Mundansa rona partidu polítiku tuir mandatu konstituisaun hodi marka loron eleisaun,” Egidio de Jesus hateten

FM sujere ba PR katak iha meadu fulan janeiru ne’e bele dekreta kalendáriu eleisaun no fiksa eleisaun prezidensiál iha marsu 2022 ne’ebé kompeténsia prerogativu Xefe Estadu nian.

Bainhira Xefe Estadu dekreta ona kalendáriu eleisaun mak FM sei reúne fali dirasaun nasionál to’o baze hodi realiza komferénsia nasionál ida hodi deside kandidatura mai hosi partidu rasik  ka apoiu kandidatura ruma hodi kompete iha eleisaun prezidensiál 2022.

Tuir artigu 12 husi lei númeru 7/2006, 28 dezembru, ho alterasaun susesiva ba lei ne’e, Prezidente Repúblika tenke rona uluk Governu no partidu polítiku ho asentu iha Parlamentu Nasionál, molok dekreta data eleisaun ba Prezidente Repúblika.

Prezidente Repúblika sei rona partidu polítiku sira ho asentu iha Parlamentu Nasionál atu hatene sira-nia hanoin kona-ba data eleisaun prezidensiál ne’ebé sei akontese, pelu menus, loron 60 molok Prezidente atuál ramata ninia mandatu iha 20 maiu 2022.

Tuir ajenda, iha loron 07 janeiru, Xefe Estadu mós sei halo enkontru hodi rona partidu Partidu Unidade Dezenvolvimentu Demokrátiku (PUDD), Kongresu Nasionál ba Rekonstrusaun Timor-Leste (CNRT, siglá portugés), Kmanek Haburas Unidade Nasionál Timoroan (KHUNTO) no Uniaun Demokrátika Timorense (UDT).

Notísia Relevante: Frente Mudanca sei deside kandidatu PR liuhosi konferénsia

Kaleidoskópiu 2021: tinan polítika no preparasaun eleisaun prezidensiál 2022

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here