Imajen/BTL,E.P

DILI, 06 janeiru 2022 (TATOLI)—Diretor Operasionál Manutensaun Água Saneamentu Munisípiu Dili, João de Piedade, informa estasaun bee sede suku Camea no Eis-Cendana avaria, difikulta komunidade iha suku Camea, aldeia Bedois, Ailele-Hun no Terminál Becora la asesu bee-moos.

“Ita-nia komunidade ne’ebé hela iha suku Camea, aldeia Bedois, Ailele-Hun no Terminál Becora, sira la asesu bee-moos tanba iha inundasaun ne’e ita-nia estasaun bee iha sede suku Camea no Eis-Cendana aat, no iha 04 abríl bainhira akontese sistema gravitasaun Mota Benamauk kuandu aat. Ida-ne’e impaktu ba aldeia sira-ne’e la asesu bee-moos,” João de Piedade hateten ba Agência Tatoli, iha nia knaar-fatin, Dili, kuarta ne’e.

Bainhira ekipa Operasionál Manutensaun Água Saneamentu Munisípiu Dili halo melloramentu ba sistema gravitasaun Mota Benamauk problema bee la to’o ba iha área Bedois, tanba ligasaun ilegál ne’ebé komunidade aldeia Fatuk Franscisco no aldeia seluk liga direta ho kanu ne’ebé abaste ba aldeia terminál to’o aldeia Bedois.

“Hosi ne’e, ami ba halo melloramentu no tuur hamutuk dala rua ho xefe suku Camea no aldeia sira-ne’ebé la asesu bee-moos, ami fó hanoin ba malu katak oinsa mak bele hadi’a ligasaun ilegál sira-ne’e, liu-liu ligasaun ilegál ne’ebé liga direta ba transmisaun bee hosi Benamauk nian, hosi ne’e iha balun konkorda no balun lae,” nia esplika.

Hahú hosi fulan setembru no outubru 2021 ba hadi’a sistema, nune’e bainhira sistema ne’e la’o tiha iha semana ida no rua, komunidade ba halo konfuzaun fali iha sistema entaun bee ne’e labele suli ba iha aldeia Terminál.

Haree ba problema ne’e entaun ekipa tenke monta tanki bee nian iha aldeia Ailele-Hun, tanki rua iha aldeia Bedois no tanki haat iha aldeia Terminál Becora maibé ekipa dada fali ona, tanba ekipa mellora ona sistema estasaun bee Cendana, entaun agora konsentra de’it ba aldeia Bedois no Ailele-Hun.

Daudaun ne’e Dirasaun Operasionál Manutensaun Água Saneamentu Munisípiu Dili iha ona planu no tempu badak sei ba fali aldeia Bedois no Ailele-Hun hodi halo melloramentu ba sistema estasaun bee Cendana, atu nune’e hadi’a di’ak liután sistema transmisaun ne’ebé atu enxe ba 300 metru kubiku tanke bee nian iha Fatuahi, nune’e bele fahe ba aldeia Terminál, Bedois no Ailele-Hun.

“Ami ba ko’alia ona dala rua ho xefe aldeia no xefe suku sira rasik konkorda. Ne’ebé, iha tempu badak ami sei ba halo melloramentu ba sistema ne’e, maibé bainhira mellora ba sistema ne’e ami mós tenke halo ona instalasaun metru kontadór ba sira atu selu, nune’e komunidade iha konxiénsia atu uza bee ne’e hanesan sira-nian rasik. Entaun, hakarak ka lakohi ami tenke monta metru kontadór ba sira, atu nune’e bele kontribui ba taxa,” nia informa.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here