Diretór Sentru Formasaun Profisionál Don Bosco Comoro (CFP-DBC), Adriano Maria de Jesus, SDB. Imajen TATOLI/Domingos Piedade Freitas.

DILI, 06 janeiru 2022 (TATOLI)—Diretór Sentru Formasaun Profisionál (CFP-sigla portugés) Don Bosco Comoro, Irmaun Adriano Maria de Jesus, SDB, hateten tinan ne’e Sentru Formasaun Don Bosco Comoro sei loke inskrisaun ba estudante foun 2022 iha 24 to’o 29 janeiru.

Notísia Relevante: Sentru Formasaun Don Bosco sei reativa formasaun iha 02 agostu

“Tinan ne’e, Sentru Formasaun Don Bosco Comoro sei la hahú atividade formasaun iha janeiru, tanba estudante 2021 hamutuk 140 resin sei hala’o estudu to’o marsu, tanba ne’e estudante foun 2022 sei hahú aula iha fulan marsu,” Irmaun Adriano Maria de Jesus, hateten ba Agência Tatoli, iha nia knaarfatin Comoro, Dili, sesta ne’e.

Iha tinan ne’e, Sentru Formasaun Don Bosco Comoro sei la hahú atividade formasaun iha janeiru tanba estudante 2021 hamutuk 140 resin sei tuir hela formasaun to’o marsu, tanba ne’e estudante foun 2022 sei hahú aula iha fulan marsu.

“Tanba, iha fulan marsu mak estudante 2021 hamutuk 140 resin ba halo estájiu, tanba impaktu hosi serka sanitária iha tinan kotuk. Tanba ne’e mak tinan ne’e ami prolonga tan estudante 2021 remata iha fulan marsu,” nia dehan.

Ba estudante foun sira-ne’ebé atu rejistu ne’e tenke tenke prenxe kritériu sira hanesan osan rejistu nian $5.00, sertidaun batizmu ka RDTL orijinál, kartaun eleitorál ka Billete Identidade (BI), Diploma Orijinál, Atestadu Médiku, Fotográfia koloridu no sira tenke ramata ensinu sekundáriu.

“Bainhira sirania dokumentus pasa, sira sei mai tuir entrevista no teste eskrita. Iha teste eskrita ne’e estudante sira sei teste iha matéria Matemátika, Relijiaun, Inglês no Portugés, bazea ba ida ne’e mak ami foin bele simu sira,” nia hateten.

Iha tinan ne’e, tuir planu sentru formasaun ne’e sei simu estudante foun 200-resin no bainhira pasa mak estudante na’in-60 mak sei hela iha kolejiu (asrama) no sira seluk hela iha liur mak tuir formasaun tanba espasu iha kolejiu mak limitadu.

Estudante hirak-ne’e, sei tuir formasaun iha Departamentu Automotiv, Departamentu Administrasaun, Departamentu Konstrusaun Jerál no Departamentu Air Conditioner (AC).

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here