Diretór Ezekutivu SERVE, Florêncio Sanches. Imajen TATOLI/Jogerjo Guterres

DILI, 05 janeiru 2022 (TATOLI)–Diretór Ezekutivu Servisu Rejistu Verifikasaun Emprezariál, Institutu Públiku (SERVE, I.P), Florêncio Sanches, husu Ministériu Koordenadór Asuntu Ekonómiku (MKAE) atu kria lejizlasaun hodi permite halo rejistu eletróniku.

“Governu presiza kria dekretu ou rezolusaun, tanba ne’e SERVE promove halo atividade liuhosi elektróniku. Espera fulan ne’e bele hetan aprovasaun Konsellu Ministru atu permite SERVE halo ona atendimentu públiku via eletróniku, tanba desde marsu 2014 sistema rejistu eletróniku iha ona maibé ita labele implementa tanba ho razaun lejizlasaun laiha no ita laiha fundu,” Diretór Ezekutivu hateten ba Agência TATOLI, iha ninia knaar fatin, Hudi-laran kuarta ne’e.

Daudaun ne’e SERVE serbisu maka’as ho Banku Dezenvolvimentu Aziátiku (ADB, sigla inglés), nune’e parte banku tau hela péritu sira ne’ebé iha esperénsia boot iha área rejistu komersiál elektróniku durante tinan-30.

“ADB konkorda ona maibé buat ruma tenke iha lei. Tanba ne’e SERVE agora komunika hela ho MKAE atu lori ba Konsellu Ministru atu kria dekretu Governu tanba rejistu elektróniku  importante ba Timor-Leste tanba ita nu’udar Estadu ida agora iha preprasaun atu halo adezaun ba Organizasaun Mundiál Komérsiu (OMK) no preparasaun tama Asosiasaun País Sudeste Aziátiku (ASEAN),” nia akresenta.

Notísia relevante: SERVE rejista empreza foun 4.200 iha tinan 2021

Organizasaun rua ne’e presiza atividade komersiál la’o ho forma dijitál, tanba kestaun ne’e tama mós dezempeñu ba adezaun.

“Dijitalizasaun katak SERVE tenke halo rejistu ba komerisál hotu ho lisensiamentu komersiál dijitál, labele ho manuál, tanba mundu internasionál agora rekere hela mai Timor-Leste katak ita presiza halo rejistu eletróniku,” nia akresenta.

Bainhira SERVE aplika ona sistema elektrónika, sei iha kritéria hamutuk 251 ka hanaran Servisu Integradu SERVE (SIS), ne’ebé iha ligasaun ba entidade relavante sira hanesan imigrasaun.

“Bainhira ema estrajeiru ruma mai rejistu kompañia, imigrasaun  hatene kedan nia bele vistu ka lae, ba Ministériu Finansa (MF) bele hatene ema ne’ebé mai rejistu tantu iha rai-laran no rai-li’ur no ligasaun ba Ministériu Saúde (MS) bele hatene sasán ne’ebé hatama inklui Ministériu Justisa no Ministériu Turizmu Komérsiu no Industria (MTKI),” Diretór Ezekutivu dehan.

Aleinde ne’e kritériu ba ministériu relevante sira mak iha lisensiamentu setorál hodi bele asesu ba sistema eletróniku hanesan padraun internasionál ne’ebé Servisu Rejistrasaun sei adota iha tempu badak nia-laran.

“Servisu kooperasaun SERVE no ADB ne’e agora la’o hela, ne’ebé Timor-Leste hein apoiu de’it no la hasai osan ruma, parseiru mak hasai hodi selu péritu no konsultór sira,” nia tenik.

Jornalista : Arminda Fonseca

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here