Prezidente Komisaun Rekrutamentu, António Boquifai atuál Diretór Rekursu Umanu no Finansa. Imajen Tatoli/Abílio Elo Nini.

OÉ-CUSSE, 05 janeiru 2022 (TATOLI) – Prezidente Autoridade Rejiaun Administrativa Espesiál Oé-Cusse Ambeno (RAEOA), Arsénio Paixão Bano, hatún despaixu halo prosesu rekrutamentu hodi hasa’e kualidade edukasaun iha enklave ne’e.

“Iha diresaun edukasaun sei menus, entaun Prezidente Autoridade hatún despaxu atu halo rekrutamentu, nune’e bele hasa’e kualidade edukasaun iha RAEOA,” Prezidente Komisaun Rekrutamentu, António Boquifai atuál Diretór Rekursu Humanu no Finansa, António Boquifai, ko’alia iha salaun edukasaun, Oé-Cusse, kuarta ne’e.

Entretantu, karta despaxu ne’ebé Agência Tatoli asesu, ho númeru referénsia 467/DRHF/SRESS/RAEOA-ZEESM TL/IX/ 2021, rekrutamentu ba funsionáriu Edukasaun Juventude no Desportu ba profesór no téknika administrasaun.

Nune’e kandidatu funsionáriu na’in-180 kuarta ne’e tuir teste orál hodi integra iha Diresaun Edukasaun Juventude no Desportu iha Rejiaun Administrativa Espesiál Espesiál Oé-Cusse Ambeno (RAEOA).

Prezidente Komisaun Rekrutamentu, António Boquifai atuál Diretór Rekursu Humanu no Finansa, informa, kandidatu funsionáriu na’in-180 ne’e kompleta ona prosesu selesaun dokumnetu no teste eskrita.

Konkursu públiku ne’e komposta hosi vaga ba profesór 58 inklui asistente ba profesór 22 nune’e bele koloka ba iha eskola Sekundáriu Jerál (ESG, sigla portugés), Ensinu Báziku Sentrál (EBC, sigla portugés) no Ensinu Báziku Filiál (EBF) iha teritóriu Oé-Cusse.

Nune’e mós halo rekrutamentu ba funsionáriu téknika administrasaun hamutuk vaga ualu (8), ne’ebé sei presiza ema na’in-24 hodi koloka kada departamentu edukasaun nian.

Nia fó sai-katak, iha inísiu kandidatu sira submete dokumentu hamutuk 400, maibé liuhosi prosesu selesaun dokumentu no teste eskrita na’in-180 mak pasa.

Daudaun ne’e totál profesór iha RAEOA hamutuk na’in-869 komposta hosi parmanente na’in-450 no kontratadu na’in-369, ne’ebé hala’o kna’ar iha eskola EBF hamutuk 71, EBC 20, ESG públiku no privada hamutuk lima (5), purtantu ba eskola Téknika Vokasionál iha haat (4) no eskola Pre-eskolár 14.

Nune’e totál eskola públika iha Rejiaun Administrativa Espesiál Oé-Cusse Ambeno hamutuk 102 no eskola privada 12 hamutuk 114.

Notísia relevante: RAEOA loke konkursu rekruta profesór na’in-58

Jornalista         : Abílio Elo Nini
Editór               : Evaristo Soares Martins

PUBLISIDADEiklan