Ekipa Jestaun Merkadu husu negosiante labele faan sasán iha trotoar leten iha estrada públiku. Imájen Tatoli//Nelia Fernandes.

DILI, 05 janeiru 2022 (TATOLI)—Autoridade Munisípiu Dili liuhosi Dirasaun Jestaun no Merkadu hamutuk ho Administradór Esquarda Polísia Nasionál Timor Lorosa’e (PNTL) Don Aleixo, hala’o operasaun ba negósiante ambulante ne’ebé faan sasán iha trotoar leten iha aldeia Kampung Baru, suku Comoro, postu administrativu Don Aleixo.

“Ohin, ami ekipa konjunta halo operasaun ba negósiante ambulante sira-ne’e tanba tuir programa 2022 hosi Departamentu Jestaun Merkadu ne’ebé halo koordenasaun entre administradór postu Don Aleixo no Esquarda PNTL atu halo mudansa totál ba vendedór ambulante sira-ne’ebé faan sasán iha estrada ninin hanesan Kampumg Barru, Elemloi, no negósiante ambulante ne’ebé faan nú iha Pertamina oin inklui iha Bairru Píte,” Xefe Departamentu Jestaun no Merkadu, Arthur Henriques, hateten ba Agência Tatoli, iha Kampung Baru, Comoro, Dili, kuarta ne’e.

Tuir nia, aban ekipa (kinta, 06 janeiru) sei kontinua halo operasaun ba negósiante ambulante sira-ne’ebé faan sasán iha trotoar leten área postu administrativu Na’in Feto nian.

Tanba, nia esplika, Dekretu-Lei númeru 33/2018, 27 agostu, hosi Artigu 01 to’o 08 hateten katak bandu ema labele faan sasán iha trotoar leten, maibé ba ema sira-ne’ebé sei nafatin faan ami sei foti medida no iha futuru sei prega ka selu multa.

Nune’e, durante hala’o operasaun ba negosiante abulante sira-ne’e ekipa halo apreensaun sasán hanesan modo-tahan, roupa obralan no meza ne’ebé uza hodi halo negósiu, tanba negósiante sira-ne’e la kumpre orientesaun ka regra ne’ebé iha.

“Sasán sira uza hodi tau modo iha dalan ninin ne’e ami foti hotu no sei la fó-fila no ba sasán at sira, ami sei ba soe iha Tasi-Tolu. Maibé ba modo-tahan sira-ne’e, ami sei ba fó orfonatu sira. Tanba ne’e, ba sé de’it mak kontinua halo atividade sira hanesan ne’e ami sei foti nafatin,” nia dehan.

Iha fatin hanesan, Administradór Interinu Don Aleixo, Mario Barreto, hateten atividade ne’ebé hala’o ne’e tanba kumpre lei númeru 33 kona-bá Orden Públiku Ijiéne, tanba hakarak asegura Dili sai sidade ne’ebé moos.

“Agora tempu udan no ita hatene katak impaktu hosi udan ne’e sei kauza buat barak. Ida-ne’e nia implikasaun hosi soe lixu arbiru no seluk ita la asegura ita-nia kapitál Dili hosi lixu, entaun buat hotu sei implika ba ita. Tanba ne’e, ita iha hanoin atu oinsá asegura ida-ne’e no seluk ita hakarak garante estrada públiku ba movimentu transporte públiku bele la’o ho di’ak,” nia dehan.

Negósiante ambulante, Ana Judit Magno, hateten nia parte faan sasán iha estrada ninin, tanba uza ba nesesidade loro-loron nian.

“Ami faan sasán iha ne’e, tanba ami-nia nesesidade loron-loron nian, hanesan ba familia no oan sira-nia eskola, depois mai foti tiha ami-nia sasán hanesan ne’e, ami atu uza saida ba uza bah an loro-loron nian,” nia dehan.

Kona-bá Governu prepara ona merkadu hanesan Taibesi no Manleu, nia hateten merkadu rua ne’e sira labele halo negósiu iha laran tanba fatin la sufisiénte.

“Merkadu rua ne’ebé prepara hosi Governu ne’e la’ós ami lakohi halo negósiu iha ne’ebá, maibé fatin mak laiha. Tanba iha ne’ebá ema hotu iha fatin ona, entaun ami ba tan atu faan iha ne’ebé. Tanba ne’e, ami-nia hakarak Governu loke merkadu kiik-oan ida iha suku rua hanesan Madohi no Kampung Baru nia klaran, atu ami bele halo negósiu bá, tanba ami-nia produtu lokál barak ne’ebé ami prodús rasik liuhosi kuda modo rasik, nia hateten.

Jornalista : Nelia Fernandes

Editór       : Cancio Ximenes

 

PUBLISIDADEiklan

HAKEREK NO HATÁN

Please enter your comment!
Please enter your name here