Diretór Servisu Munisipál Edukasaun Baucau, Augusto Hornai Ximenes. Imajen Tatoli/Natalino Belo.

BAUCAU, 04 dezembru 2022 (TATOLI) –  Servisu Edukasaun Munisípiu Baucau, fó-sai katak, hahú hosi 2017 to’o 2021 estudante sira iha munisípiu Baucau laiha kaderneta nune’e valór ezame prenxe de’it iha surat-tahan.

Diretór Servisu Edukasaun Munisípiu Baucau, Augusto Hornai Ximenes, hateten, situasaun refere parte edukasaun Baucau hasoru durante tinan-lima ona nune’e estudante sira iha munisípiu Baucau maioria seidauk iha kaderneta.

“Iha fulan-abríl liubá foin mak simu rihun tolu resin, distribui ona, mais maioria alunu sira seidauk hetan kaderneta, hahú hosi tinan 2017-2021, kuaze tinan-5 ona,” Diretór Edukasaun Baucau hateten iha Vila Nova, tersa ne’e.

Maske nune’e parte edukasaun Baucau hato’o ona preokupasaun refere ba parte Ministériu Edukasaun, Juventude no Desportu (MEJD) liuhosi reuniaun maibé seidauk iha resposta.

Nune’e edukasaun Baucau orienta diretiva eskola sira hotu atu utiliza kaderneta provizóriu hodi prenxe estudante sira-nia valór ezame.

“Maibé ita kontinua hato’o liuhosi reuniaun ruma iha nasionál,” Augusto akresenta.

Koordenadór Eskola Ensinu Báziku Filiál (EBF), Caibada Makasa’e, Domingos Freitas, husu MEJD atu responde preukupasaun menus kaderneta ne’ebé parte eskola hasoru durante tinan-lima ona.

“Ami prenxe de’it ba surat-tahan mutin hodi fahe de’it iha tempu distribuisaun kaderneta,” Domingos hateten.

Purtantu totál eskola hahú hosi pre-eskola, ensinu báziku, sekundária no tékniku vokasionál iha Baucau hamutuk 243 ho totál estudante hamutuk 41.255 no profesór hamutuk 2.200-resin.

Jornalista         : Natalino Belo

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here