Komandante Polísia Nasionál Timor-Leste (PNTL) Munisipiu Baucau, Superintendente Xefi António Maria de Sá. Imajen Tatoli/Natalino Belo.

BAUCAU, 05 dezembru 2022 (TATOLI) – Komandante Polísia Nasionál Timor-Leste (PNTL) Munisipiu Baucau, Superintendente Xefi António Maria de Sá, husu entidade hotu servisu hamutuk redús krime iha munisípiu refere.

Superintendente Xefi, António de Sá, foin simu knár nu’udar komandante PNTL munisípiu Baucau iha loron 3 janeiru 2022.

“Hanesan autoridade seguransa liuliu nu’udar Baucau-oan, ha’u otimista no iha komitmentu ida katak atu iha sussesu la’ós komandante munisípiu mesak maibé entidade hotu-hotu presiza iha espíritu kolaborativu inklui jornalista sira,” António de Sá hateten iha Vila Nova, kuarta ne’e.

Nu’udar Baucau-oan prontu servisu hamutuk ho entidades hotu hanesan autoridade tantu sivíl no militár, sosiedade sivíl, igreja no komunidade atu asegura seguransa nune’e mantein Baucau hanesan sidade daruak iha Timor-Leste.

Eis komandante PNTL Munisípiu Covalima ne’e akresenta, atu ba oin entidade hotu-hotu tenke sai nu’udar na’in ba rai Baucau nune’e presiza rona, fiar malu no respeitu malu hodi utrapasa barreira ka obstákulu ne’ebé hasoru.

“Hanesan Baucau oan ha’u senti urgullu tanba ne’e ha’u-nia komitmentu no dezeja mak Baucau oan tenke hamutuk Baucau ba oin, ne’e hau-nia moto,” António argumenta.

António rekoñese inisiu nia mandatu mosu asidente hanesan sidadaun na’in-lima ne’ebé tenke lakon vida iha loron 2 janeiru iha tasi Binagua, postu administrativu Laga no na’in-ida iha suku Lavateri, Baguia tanba hariis mota.

Nune’e mós iha insidente konfrontu kiik entre joven iha loron 1 janeiru tanba kondisaun lanu ne’ebé envolve autór na’in-lima no daudaun ne’e kontinua prosesa tuir lei.

Superintendente Xefe António de Sá hahú serbisu iha loron 3 janeiru hodi subtitui Komadante PNTL Baucau sesante, Superintendente Armando Monteiro.

Jornalista         : Natalino Belo

Editór               : Evaresto Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here