Administradór Munisípiu Covalima, Francisco de Andrade. Imajen Tatoli/Celestina Teles.

COVALIMA, 05 janeiru 2022 (TATOLI)—Administradór Munisípiu Covalima, Francisco de Andrade, kuarta ne’e hatuur fatuk dahuluk fatuk dahuluk konstrusaun edifísiu postu administrativu Maucatar iha suku Holpilat, aldeia Leogore. 

“Tuir loloos ita-nia konstrusuan ne’e finaliza ona maibé impaktu hosi COVID-19 entaun ohin mak ita foin hahú hatuur fatuk dahuluk, nune’e ita hahú halo ona konstrusuan ba edifísiu postu administrasaun Maucatar,” Administradór Munisípiu Covalima, Francisco de Andrade, hateten liuhosi ninia diskursu iha serimónia hatuur fatuk dahuluk iha suku Holpilat.

Edifísiu ne’e konstrui hosi kompaña SABUDOI Unipesoal Lda ne’ebé konstrusaun ho nia durasaun tempu durante fulan neen (6) ho orsamentu mai hosi OJE 2021 ho montante $164,861.91.

“Ohin hahú halo lansamentu, kona-ba traballadór sira ha’u husu tenke uza ema iha ne’e no kona-ba tékniku ita bele lori mai hosi fatin seluk tanba bazea ba lei,” nia hateten.  

Nia mós fó hanoin ba administradór postu administrativu Maucatar, xefi suku no komunidade tenke asegura, nune’e konstrusuan la’o ho susesu no finaliza lalais bazea ba kontratu hodi fasilita komunidade.  

Ba asuntu ne’e, autoridade sira tenke kontinua koordena ho kompaña hodi kontrola servisu konstrusuan edifísiu refere atu labele iha inpedimentu, tanba timor-oan nia karáter ida mak gosta protesta no husu direitu barak liu lahatene nia dever mak saida.

“Bainhira akontese tenke informa ba administradór postu administrativu no xefe suku sira atu bele rezolve. Konstrusuan edifísiu susesu ka lae depende iha kompañia no komunidade nia liman,” nia dehan. 

Supervizór Kompañia SABUDOI Unipesoal Lda, Alfredo dos Santos, promete sei utiliza traballadór sira iha suku Holpilat ne’e, nune’e konstrusaun ne’e bele la’o ho di’ak. 

“Kona-ba atu uza trabaldór na’in hira ami seidauk hatene. Bazea ba ami nia trajetu ema na’in-30 no ami sei uza traballadór sira iha suku ida-ne’e,” nia dehan.

Jornalista : Celestina Teles

Editór       : Cancio Ximenes 

PUBLISIDADEiklan

HAKEREK NO HATÁN

Please enter your comment!
Please enter your name here