Komandante PNTL Munisípiu Bobonaro, Superintendente Antoninho Mauluta. Imajen Tatoli/Sérgio da Cruz.

BOBONARO, 03 janeiru 2022 (TATOLI) – Komandu Polísia Nasionál Timor-Leste (PNTL) Munisípiu Bobonaro, rejista ema na’in-rua mate durante selebrasaun Natál 2021 no tinan foun 2022.

Komandante PNTL Munisípiu Bobonaro, Superintendente Antoninho Mauluta, informa, asidente ne’e ida akontese envolve autór minoridade lori Motorizada soke ema mate no ida asidente singulár ka mesak monu mate.

Asidente tráfegu motorizada soke ema ne’e akontese iha loron 27 dezembru 2021 iha área dalan públiku merkadu Maliana, suku Lahomea, postu administrativu Maliana, tuku17:06 lokraik. Asidente ne’e rezulta vítima insiál DXPB ho idade 63 kanek grave transporte ba Hospital Referál Maliana la konsege salva nia vida.

Nune’e mós asidente singulár akontese iha postu administrativu Cailaco iha loron 01/01/22) rezulta vítima LP (klosan), idade 30 mate fatin.

“Kazu ne’e asidente dupla ne’e motorizada soke katuas ida, lori mai ospital mak mate no iha ona prosesu, depois ida asidente úniku iha Cailaco, parte vítima nia família deskonfia ema oho, ninia prosesu investigasaun la’o hela,” nia informa ba jornalista sira, iha Maliana, segunda ne’e.

Superintendente ne’e hatutan, maske rejista ema na’in-rua mate, maibé iha postu administrativu sira hanesan Atabae, Balibo, Bobonaro no Loloto’e la rejista asidente no kazu krime ruma.

“Komandu munisípiu Bobonaro, agradese tebes ba ita-nia komunidade sira-ne’ebé mak durante loron boot ne’e koopera di’ak ho polísia, tanba situasaun jerál iha munisípiu Bobonaro la’o ho di’ak nafatin,” nia katak.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here