Ministru Administrasaun Estatál (MAE), Miguel Pereira de Carvalho, asina plaka pre-eskolár iha suku Vessoru, tersa (04/01). Imejen TATOLI/Vitorino Lopes da Costa

VIQUEQUE, 04 janeiru 2022 (TATOLI)–Ministru Administrativu Estatál (MAE), Miguel Pereira de Carvalho, hamutuk ho autoridade lokál, ofisialmente inaugura pre-eskolár iha suku Vessoru, postu Uatulari, munisípiu Viqueque.

“Ohin, ha’u mai inaugura edifísiu pre-eskolár sala tolu ne’ebé konstrui iha tinan 2021 hodi fasilita labarik sira tuir prosesu aprendizajen iha suku Vessoru,” Ministru hateten hafoin inaugura eskola iha suku Vessoru, tersa ne’e.

Pre-eskolár ne’e konstrui hosi Programa Nasionál Dezenvolvimentu Suku (PNDS), ne’ebé transfere fundu direta ba konta suku sira hodi komunidade no autoridade bele identifika prioridade iha suku no aldeia.

Nune’e, bainhira tama iha suku Vessoru, identifika programa prioridade maka konstrui eskola.

“Programa PNDS ne’e parte ida hosi Governu atu halo dezenvolventu iha área rurál tanba ita-nia komunidade iha área rurál presiza tebes intervensaun hosi Governu, hodi fó resposta ba komunidade nia preokupasaun iha área rurál,” Ministru akresenta.

Autoridade lokál identifika iha problema barak iha komunidade nia le’et hanesan estrada, eskola, fasilidadade saúde no bee-moos.

Tanba ne’e, PNDS mai hodi implementa programa sira iha suku hodi fasilita atividade povu sira iha área rurál.

Iha fatin hanesan, Diretora PNDS nasionál, Claudina Pinto, informa, konstrusaun pre-eskolár sala tolu ho kustu hamutuk $48.000.

Nune’e mós, Xefe suku Vessoru, Chiquito Lopes, agradese ba Governu, tanba bele implementa programa ne’ebé bele benefisia ba komunidade lokál.

“Edukasaun importante ba ita-nia oan sira,” nia tenik.

Seremónia inaugurasaun pre-eskolár ne’e partisipa hosi Autoridade munisípiu Viqueque, Januário Soares ‘Boly’, xefe suku no komunidade lokál.

Jornalista : Vitorino Lopes da Costa

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here