Prezidente KAEES, Maria Filomena Lay Guterres. Imajen/média UNTL.

DILI, 04 janeiru 2022 (TATOLI)–Komisaun Asesu Engeresu Ensinu Superiór (KAEES), semana ne’e realiza prosesu korresaun pontu ezame admisaun hosi kandidatu na’in-6.087 ne’ebé konklui ona iha territóriu nasionál, atu asesu ba Universidade Nasionál de Timor-Leste (UNTL) no Institutu Politékniku Betanu (IPB).

Diretór Jerál Ensinu Superior no Prezidente KAEES, Maria Filomena Lay Guterres, hateten, kandidatu hirak ne’e hosi rejime oportunidade iha 4.179, veteranu nia oan iha 831, hakbiit 1.024, idade 23 iha na’in-20, estranjeiru sia no eskola internasionál ida.

“Ho nune’e, prosesu korresaun pontu ezame admisaun ba kandidatu sira sei realiza iha semana tuir mai tanba Ministériu Ensinu Superior Siénsia no Kultura (MESSK) sei uza hela fasilidade Ministériu Edukasaun Juventude no Deportu (MEJD) nian, enkuantu daudaun ne’e MEJD mós sei halo hela korresaun ba pontu ezame nasionál,” Prezidente KAEES informa ba Agência TATOLI, iha ninia knaar fatin, edifísiu Colmera, tersa ne’e.

Notísia relevante: MESSK iha ona mákina korresaun pontu ezame admisaun asesu UNTL-IPB

Enkuantu hosi kada munisípiu ne’ebé maka ninia kandidatu sira partisipa ona iha ezame admisaun, kompostu hosi Aileu 133, Ainaro 242, Baucau 431, Bobonaruo199, Covalima 134, Dili 1.127, Ermera 249, Lautém 180, Liquiçá 204, Manatuto 125, Manufahi 141, Oé-cusse 188 no Viqueque 192.

Rejime seluk ne’ebé la ezije teste mak ba FALINTIL-Forsa Defeza Timor-Leste (F-FDTL), Polísia Nasionál Timor-Leste (PNTL), desportiva inklui alta kualidade tanba sira tama rejime espesiál.

Jornalista : Tomé Amado

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here