Diretór Rejionál Agrikultura ba RAEOA, Cirilio dos Remedios Baba. Imajen Tatoli/Abílio Elo Nini.

OÉ-CUSSE, 03 janeiru 2022 (TATOLI) – Autoridade Rejiaun Administrativa Espesiál Oe-Cusse Ambeno (RAEOA), liuhosi Diresaun Rejionál Agrikultura, kinta semana kotuk hahú distribui fini tipu neen ba grupu agrikultór 12 iha aldeia Kuantua, suku Usitaku, sub-rejiaun Nítibe.

Diretór Rejionál Agrikultura, Cirilio dos Remedios Baba, informa, objetivu hosi distribuisaun ne’e atu motiva komunidade sira, hatene kuda no proteje nune’e bele redús produtu importasaun.

“Distribuisaun fini sira-ne’e bazea proposta mai hosi kada suku no sub-rejiaun sira, tanba daudaun ne’e estoke fini iha diresaun sufisiente atu atende ba komunidade, no daudaun ne’e diresaun sei kontinua hein proposta hosi sub-rejiaun Oésilo Pássabe no Pante Makassar, ba Nitibé mak grupu 12 ne’e ita distribui ona iha semana kotuk,” Cirilo Baba informa ba Agência iha Oé-Cusse, segunda ne’e.

Nia fó sai-katak, autoridade apoia fini ne’e dahuluk hosi Nítibe hamutuk produtu tipu neen ba grupu agrikultór 12, maka hanesan hare kilograma 600 ho área kultiva ektare 20, fore-rai kilograma 200 ho área kultiva ektare 1,5, fore-mungu kilograma 65 ho área kultiva ektare 5,6.

Nune’e mós fore-keli kilograma 20 ho nia área kultiva ektare 1,5, koto kilograma 100 ho área kultiva ektare 6,5, maek kilograma 5, adubu orgániku, pop-nasa litru 30, super-nasa kilograma 30, hansprayer unit-2.

“Ita sei akompaña grupu sira ba produtu sira-ne’e, tanba modelu kuda sei aplika tékniku sistema nian, nune’e bele garante kualidade fini ne’e, tan ne’e atu aplika sistema kultiva, ita sei enkoraja komunidade sira serbisu hamutuk ho funsionáriu estensionista suku sira atu apoiu formasaun,” nia fó-sai.

Xefe aldeia Kuantua, Júlio Tolan, agradese ba autoridade tanba apoia ne’ebé distribui fini ba grupu sira iha sub-rejiaun Nítibe, tanba kooperasaun entre autoridade lokál ho komunidade hodi eskolla iha kada suku nune’e submete proposta ba autoridade to’o hetan aprovasaun.

Entretantu, grupu agrikultór 12 ne’e lokaliza iha pertense ba sub-rejiaun Nítibe ne’ebé envolve suku lima, suku Usitako, Suni-Ufe, Lela-Ufe, Bene-Ufe no Ban-Afi, mak hanesan, Noel-Enus, Usapimabun, Mena Tualeu, Faotkenfua, Asulata, Kiupeno, kuanhuen, Kis Ana, Molfatu, Nalaso, Beskole, ho totál membru grupu hamutuk ema na’in-922.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here