Polísia Munisípiu Dili, Seksaun Tránzitu halo apreensaun ba motorizada 204 no karreta privadu 24. Imajen Tatoli/Eugénio Pereira

DILI,04 janeiru 2022 (TATOLI)— Komandu Munisípiu Dili liuhosi Polísia Tránzitu hala’o operasaun ka auto stop, iha tinan 2021, konsege identifika no halo apreensaun ba karreta no motór hamutuk 5.434 tanba dokumentu inválidu no balun dokumentu laiha.  

“Durante 2021, Komandu Munisípiu Dili hala’o operasaun konsege halo apreensaun ba karreta no motór hamutuk 5.434, ne’ebé mak lori mai iha Komandu Munisipiu Dili hodi fó multa,” Komandante Polísia Nasionál Timor-Leste (PNTL) Munisípiu Dili, Superintendente Xefe, Henrique da Costa, informa, ba jornalista sira iha komandu munisípiu Dili, tersa ne’e.

Nune’e, iha tinan 2021, PNTL munisípiu Dili konsege rekolla reseita hamutuk $249.359 ba kofre Estadu.

Alende ne’e, Komandu Munisípiu Dili mós rejista kazu infrasaun ne’ebé komete hosi motorista sira hamutuk 7.404.

“Infrasaun sira ne’e, ita nia motorista sira maioria la lori dokumentu originál, infrasaun seluk mak la monta xapa matríkula karreta no motór hamutuk 1.267 no seluk maka la uza kapasete  ne’e  hamutuk 771,” nia akresenta.

Nune’e mós, PNTL konsege rejista kazu asidente tráfegu hamutuk 779, hosi númeru ne’e ema na’in 23 mak mate.

Komandu PNTL mós rejista kazu asidente tráfegu neen no óbito na’in-ida, durante selebrasaun tinan foun 2022.

Kona-ba situsaun jerál iha munisípiu Dili, Komandante ne’e dehan hahú loron 31 2021 to’o 2 janeiru 2022, situasaun  la’o normál, maski iha kazu insidente balun ne’ebé akontese tanba  kauza joven sira lanu no tuda malu, maibé polísia  hakalma kedan.

“Ita mós hakarak agradese no apresia ba komaunidade no autoridade lokál no PNTL sira tomak iha munisípiu Dili, tanba ho sira nian maturidade no matenek selebrasaun natál no tinan foun ho la’o ho hakmatek,” Komandante ne’e agradese.

Jornalista : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here