Transporte para iha Estasionamentu iha área Banco Nasionál Ultramarinho (BNU) nia oin. Imajen Tatoli/Dok

DILI, 04 janeiru 2022 (TATOLI)—Sekretariadu Prezidente Autoridade Munisípiu Dili, António Moniz Clau, informa iha tinan 2021 nia laran ne’e Autoridade Munisípiu Dili rekolla $26,469.20 hosi taxa atividade estasionamentu karreta no motór iha sidade Dili.

“Janeiru to’o dezembru 2021, ita rekolla ona $26,469.20 hosi estasionamentu Dili laran,” António Moniz Clau hateten ba Agência Tatoli iha nia knarfatin Matadoru, Dili, tersa ne’e.

Hosi taxa atividade estasionamentu ne’e, Autoridade Munisípiu Dili rekolla hosi estasionamentu lima (5) ne’ebé estabelese iha Dili laran kompostu hosi zona estasionamentu merkadu Taibesi, Avenida Liberdade da Imprensa, Avenida 20 de Maio, Avenida Martires da Pátria no Avenida rua 25 de Abril.

Hosi zona estasionámentu lima (5) ne’e, Autoridade Munisípiu Dili (AMD) iha funsionáriu hamutuk 54 mak halo servisu iha fatin estasionamentu ho supervisor na’in-haat (4) no 50 ne’e mak pesoál sira-ne’ebé mak halo kobransa ba taxa.

Zona estasionámentu sira-ne’ebé mak estabelese iha Dili ne’e bazea ba diploma ministeriál konjunta númeru 48/2017 no númeru 16/2018 ne’ebé mak aprova kriasaun zona estasionámentu durante limita iha Munisípiu Dili.

Konaba billete sira-ne’ebé koloka ba karreta no motór ne’e, hahú hosi $0,10 to’o $0,75, selu tuir tipu transporte Mikrolete inklui karreta kiik sira oras ida selu $0,25, enkuantu ba kamioneta oras ida $0,50 no karreta boot hanesan tronton oras ida selu $0,75, maibé ba motorizada oras ida selu $0,10.

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here