Komandante Jerál PNTL, Komisáriu, Faustino da Costa. Imajen Tatoli/Egas Cristovão

DILI, 03 janeiru 2022 (TATOLI)— Komandante Jerál Polísia Nasionál Timor-Leste (PNTL), Komisáriu Faustino da Costa, informa daudaun PNTL hahú prepara an atu asegura seguransa ba eleisaun Prezidensiál iha tinan ne’e.

“PNTL sempre preparadu, ho modu operasaun ne’e depende ba komandu mak sei haree. Maibé, membru PNTL preparadu ona hodi asegura seguransa eleisaun prezidensiál tinan ne’e,” Komandante Jerál PNTL, hateten iha ámbitu pose ba komandante munisípiu sira iha Kuartél Jerál PNTL, Caicoli, segunda ne’e.

Tanba ne’e, Komandu PNTL hahú haree lojístika ba membru sira nian presiza perante fó seguransa ba atividae eleisaun prezidensiál.

Komandu PNTL fó orientasaun ne’e tanba daudaun Governu liuhosi órgaun eleitorál sira hahú halo preparasaun tékniku hodi realiza eleisaun Prezendensiál iha tinan ne’e.

“Ha’u husu ba Komandante sira no membru sira atu hala’o knaar bazeia de’it ba konstituisaun hodi hala’o knaar ho imparsiál no independente hodi la haree kór, rasa, etníku no relijiaun, satán mete partidu polítiku,” Komandante Jerál PNTL ne’e enkoraja. 

Komisáriu Faustino hakarak instituisaun PNTL tenke mantein ordem no lei hosi hala’o knaar ho baze ba konstituisaun atu asegura ema povu tomak.

Jornalista : Natalino Costa

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here