Vasina Pfizer Covid-19. Imajen TATOLI/António Gonçalves

DILI, 03 janeiru 2022 (TATOLI)–Governu liuhosi Ministériu Saúde (MS) planeia ona atu lansa vasinasaun doze datoluk ba populasaun hodi prevene variante Omicron COVID-19.

“Ha’u hasoru Primeiru-Ministru, ami ko’alia kona-ba atu fó vasina doze datoluk, ne’ebé iha planu atu implementa iha tempu badak nia-laran,” Ministra Saúde, Odete Maria Freitas Belo, informa, hafoin ramata reuniaun ho Primeiru-Ministru, Taur Matan Ruak, iha Rezidénsia Farol, segunda ne’e.

Daudaun ne’e iha vasina ne’ebé disponível iha armazen Servisu Autonómu Medikamentu no Ekipamentu Saúde (SAMES) no Sentru Saúde Formosa, ne’ebé disponível ba ema na’in-6.000 sei simu iha faze dahuluk no prioridade ba ema ho idade 60 ba leten.

“Ema ne’ebé simu vasina Sinovac sei bele sona fali ho vasina AstraZeneca ka Prifizer. Vasina doze datoluk ne’e tenki prioridade mós ba sira ne’ebé ho moras todan hanesan kankru, fase-ran, moras purlmaun, no Tuberkoloze, no sira ne’ebé moras liga liu ho imunidade, hanesan HIV/SIDA. Aleinde ne’e fó mós ba liña frente, servisu iha fronteira no aeroportu,” nia akresenta.

Governu nafatin halo preparativu atu hasoru variante foun, maski desmantela ona Sala Situasaun Sentru integradu Jestaun Krize (CIGC, sigla portugés), ne’ebé daudaun Ministériu Saúde (MS) mak iha responsabiliza tomak haree ba preparasaun hodi hatán ba COVID-19 ne’e rasik ho ninia variante foun ne’e.

Notísia relevante: Desmantela CIGC, Xefe Governu husu públiku kuidadu-an hosi variante Omicron

“Ami nafatin halo serbisu iha pontu entrada hanesan aeroportu, pasajeiru sira ne’ebé mai hosi rai-li’ur tenke halo check, tenki prienxe kartaun no tenke aprezenta kartaun vasina, ne’e prevensaun sira ne’ebé Ministériu Saúde tenke halo, nune’e mós kuandu hetan kazu pozitivu kontinua halo contaact tracing,” nia subliña.

To’o domingu (02/12/2021), vasina doze dahuluk iha Timor-Leste atinje ona 83,4% no doze daruak 62,2%, enkuantu iha Dili doze dahuluk atinje ona 87,4% no doze daruak 80,4%.

Jornalista : Antónia Gusmão

Editora     : Julia Chatarina

PUBLISIDADEiklan

HAKEREK NO HATÁN

Please enter your comment!
Please enter your name here