Eis Administradór ba Oé-Cusse, Fransisco Xavier Marques, hakotu iis iha HRO. Imajen espesiál.

OÉ-CUSSE, 03 janeiru 2022 (TATOLI) – Eis Administradór Rejiaun Administrativa Espesiál Oé-Cusse Ambeno (RAEOA), Francisco Xavier Marques, hakotu iis iha Hospital Referál Oé-Cusse (HRO) tanba sofre moras Diagnosis Guillain-Barre.

Eis Administradór ne’e hakotu iis iha loron-domingu madrugada, 02 janeiru, tuku 06:15, madrugada iha Hospitál Referál Oé-Cusse (HRO).

Matebian koñesida iha RAEOA nu’udar administrador distritu Oé-Cusse iha tinan 2002 to’o 2007, nune’e iha tinan 2016 to’o outubru 2020, matebian hetan fiar sai hanesan Sekretáriu Rejionál ba Asuntu Administrasaun.

Daudaun ne’e to’o matebian hakotu iis ho kargu nu’udar Administradór ba Sosiedade Komersiál Dezenvolvimentu ZEESM, Unipessoal Lda.

“Ami-nia maun moras kleur ona, ami parte família buka dalan halo konsulta iha ospitál nomós iha rai-li’ur, maibé tanba Nai Maromak nia domin, to’o domingu nia hakotu ona iis, ne’ebé sente triste tanba maun, halo buat barak ba povu Oé-Cusse no sai mós ami-nia motivadór iha família kona-ba oinsá luta ba moris,” Família matebian, Domingos Maniquin hato’o sentimentu tristeza ne’e iha bairru Kruz, Oé-Cusse, segunda ne’e.

Nia fó sai katak, iha sabadu 01 janeiru, matebian hetan akatakasaun maka’as tanba tensaun sa’e, nune’e família deside lori ba iha Hospitál Referál Oé-Cusse hodi halo tratamentu, maibé to’o de’it iha domingu matebian hakotu iis.

Entretantu, tuir Diretóra Klínika Hospitál Referénsia RAEOA, Agnes Bana, informa, matebian hakotu iis iha ospitál ho moras diagnose Guillai-barre.

“Ha’u maka simu iha sabádu loron 01 janeiru, maibé matebian hetan moras atakasaun maka’as, nune’e matebian hakotu iis iha loron 02 janeiru, domingo madrugada,” nia haktuir.

Biografia

Francisco Xavier Marques, moris iha suku Abani, sub-rejiaun Pássabe, RAEOA, iha loron 11 agostu 1962, hosi fuan domin António Marques no Berta Bene (falesida). Matebian hanesan oan dahuluk hosi maun alin na’in-sia (9), mane na’in-tolu (3) feto na’in-neen (6). Daudaun ne’e ,atebian hakotu iis husi hosik hela feen kaben Titik Lesti ho oan na’in-tolu (3), mane nain-rua (2) feto nain-ida (1).

Edukasaun formál

Matebian Francisco Xavier Marques hahú nia estudu iha Eskola Bázica iha tempu koloniál portugés, komesa iha 1969 iha eskola primária Pássabe hahú hosi Kartila, iha tinan 1970 to’o 1972, matebian kontinua nia estudu iha primeira klasse no segundu klasse iha Eskola Katólika Haemnanu, sub-rejiaun Pássabe.

Nune’e iha 1972 to’o 1973, matebian kontinua-tán nia estudu iha eskola Koléjiu São José Oé-Cusse iha tempu koloniál portugés, no matebian kontinua-tán iha Eskola Pré-Sekundária iha tinan 1976 no remata iha tinan 1979.

Iha tinan 1980 to’o 1984, matebian hili dalan hodi hala’o-tán nia estudu iha rai-li’ur, iha semináriu Laleia, Atambua, nune’e hahú hosi 1995 to’o 1997, matebian hetan bolsu estudu ba programa Lisensiádu iha Institutu Ilmu Pemerintahan Jakarta Indonésia.

Tama to’o faze independénsia iha tinan 2010 to’o 2012, matebian hetan bolsu estudu hosi Ministériu Administrasaun Estatál, hodi kontinua nia estudu ba programa mestradu iha Jogjakarta, Indonésia, nune’e durante matebian nia viajén iha mundu ne’e ho nivél edukasaun formál nian, ho nivel mestradu iha área “Ilmu Pemerintahan”.

Esperiénsia no kontribuisaun iha karreira profisionál

Iha tinan 1985 to’o 1989 tempu okupasaun Indonésia, matebian hetan bolsu estudu husi estadu Indonésia provínsia Timor-Timur, hodi kontinua nia estudu ba kursu iha área “Akademi Pemerintahan Dalam Negri”, iha Kupaun Indonésia.

Nune’e mós matebian nu’udar funsionáriu PNS (Pegawai Negri Sipíl), depois remata nia estudu iha Kupaun.

To’o iha tinan 1991, matebian hetan konfiansa hosi Administradór (Kepala Daerah Tinkat-2) Ambeno, nomea nu’udar Sekretaris Wilayah Kecamatan Oésiloi, ha tinan 1998 to’o 1999, matebian kontinua hetan konfiansa nomea nu’udar kepala Pemerintahan desa tinkat-2 Ambeno.

Iha outubru 1999 to’o 2000, Matebian hakna’ar-an iha UNHCR to’o fali 2001 hakna’ar-an hanesan Field Officer iha UNMIT. Iha 2002 to’o 2007, matebian sai servidór Estadu Timor-Leste iha Ministériu Administrasaun Estatal, nune’e tuir selesaun pór méritu, matebian hetan konfiansa hosi Estadu hodi sai nu’udar Administradór Distritu Oé-Cusse iha tempu ne’ebá.

Iha 2007 matebian termina nia mandatu hanesan Administradór, nune’e hosi 2008 to’o 2009, matebian sai hanesan funsionáriu iha Ministeriu Administrasaun Estatál, Dili, Timor-Leste, to’o fali 2013.

Iha marsu 2015, matebian hetan títulu foun hodi sai hanesan Inspetór Jerál iha Ministériu Administrasaun Estatál ba Oé-Cusse.

Nune’e iha 2016 matebian hetan konfiansa hosi primeiru Prezidente Autoridade RAEOA Mari Alkatiri, sai hanesan Sekretáriu Rejionál ba Asuntu Administrasaun durante tinan-lima (5), no termina iha outubru 2020.

Iha tinan 2020, matebian hetan-tán fiar hosi Presidente Autoridade RAEOA, Arsénio Paixão Bano, hodi sai hanesan, Administradór ba Sosiedade Komersiál Dezenvolvimento ZEESM, Unipessoal Lda, to’o hakotu iis iha Hospitál Referál Oé-Cusse iha domingu madrugada, 02 janeiru 2022, tuku 06:15.

Kontribuisaun ba prosessu ukun rasik-án

Durante iha prosesu luta ba ukun rasik-án, matebian sai hanesan membru IMPETU (Ikatan Mahasiswa Pelajar Timor-Timur). Iha 1999, matebian pastisipa iha ogranizasaun klandestina, forsa REPETIL, pro-Referendu depois anúnsia rezultadu hosi konsulta populár, matebian la-halai ses ba Indonésia, maibé ho aten brani, kontinua mobiliza joventude evakua ba satán-an iha foho.

Nune’e durante matebian nia partisipasaun iha vida politíka, matebian hanesan militante, kuadru FRETILIN no membru komisaun politíka rejionál partidu FRETILIN.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here