PNTL liuhosi Unidade Batallaun Orden Públika (BOP) hala'o tereinu hasoru demostrasaun sira. Iha Caicoli estrada BOP nia oin, kinta (19/10). Imajen Tatoli/Francisco Sony

DILI, 03 janeiru 2022 (TATOLI)— Polísia Nasionál Timor-Leste (PNTL) liuhosi  Departamentu Justisa, rejista membru hamutuk na’in-186 mak komete irregularidade.

Xefe Departementu Justisa, Komandu Jeràl Polisia Nasionàl (PNTL), Superintendente Xefe Polísia Agustinho Gomes da Silva, informa, durante 2021, rejista irregularidade ka kazu infrasaun disipliñar ne’ebé komete hosi membru hamutuk 186.

“Hosi totál ne’e kazu infrasaun disipliñar ne’ebé komete hosi membru polísia na’in-186 ne’e, na’in-115 mak konklui ona prosesu, na’in-61 sei iha hela prosesu laran no 10 iha pendente iha tribunal tanba iha indísiu krime. Nune’e Komandante Jeràl husu ba Ministériu Públiiku submete ba tribunal,” Xefe Departementu Justisa PNTL ne’e informa ba jornalista sira iha Kuartél Jerál PNTL-Caicoli, segunda ne’e.

Alende ne’e, Xefe Departamentu Justisa ne’e afirma kazu membru polísia ne’ebé arquiva no liha pena disipliña hamutuk 36 no aplika pena disipliña reprensaun eskrita iha kazu 47 no aplika pena disipliñar durante loron 10 to’o 30 iha kazu 17. Enkuantu pena suspende disipliñar durante loron 31 to’o 90 iha kazu 11.

“Ita aplika pena disipliña suspensaun loron 91 to’o 120 iha kazu rua no demisaun ba membru PNTL iha tinan 2021 iha kazu ida,” Xefe Departementu Justisa ne’e akresenta.

Hosi irregularidade hirak ne’e komete hosi membru sira ne’ebé hala’o knaar iha Komandu Jerál PNTL, tuir fali Komandu PNTL munisípiu Dili, Unidade Espesiál Polísia (UEP), Unidade Polisia Maritima (UPM), Komandu Munisípiu Aileu, Komandu Munisípiu Ainaro, Komandu Munisípiu Baucau, Komandu Munisípiu Bobonaro.

Jornalista  : Natalino Costa

Editór       : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here