Prezidente Repúblika,Francisco Guterres Lú Olo. Imajen Tatoli/António Gonçalves.

DILI, 31 dezembru 2021 (TATOLI—Prezidente Repúblika, Francisco Guterres Lú Olo, hateten hela de’it ona oras balun atu tinan 2021 ramata no ema hotu sei husik ba kotuk tinan ida nakonu ho dezafiu oioin hodi simu tinan foun (2022) ho domin no dame.

“Ha’u nia mensájen ba tinan foun mak ne’e. Ho laran malirin no matenek rasik husi ida-idak, ita sei la’o ba oin ho hanoin no hahalok foun. Ita bele haburas ekonomia di’akliu atu hamenus ki’ak lalais liu. Ha’u fiar nafatin katak ita sei hakaat dezafiu no difikuldade hotu-hotu, ita hasoru nu’udar Povu no Nasaun. Ha’u konta ho imi hotu no imi hotu bele konta mós ho ha’u-nia apoiu. Tinan foun ho domin no dame ba Povu tomak,” Prezidente Repúblika hateten liuhosi mensajen tinan foun nian ne’ebé hala’o iha Palásiu Prezidensiál Nicolau Lobato, Bairru Pité, Dili, kinta ne’e.

Ba tinan oin no tuir mai, Xefe Governu ne’e hateten, Timor-Leste tenke hamenus kiak no dezigualdade tanba maiór parte família iha Timor-Leste laiha kondisaun atu oan sira estuda iha uma tanba laiha meiu teknolójiku modernu.

Timor-Leste presiza hadi’ak kondisaum ba labarik no joven sira estuda iha uma, hodi bele halakon dezigualdade sosiál Timor-Leste.

“Ita tenke preokupa ho ita-nia auto-sufisiénsia alimentár.  Katak importante tebes prodús rasik ita-nia hahán tanba soberania alimentar halo parte soberania País nian.  Atu garante ida-ne’e, ita tenke investe makaas liután iha agrikultura ho atensaun espesiál ba agrikultura família nian no haree oinsá tulun lori sira-nia produtu ba merkadu,” Lú Olo hateten.

Atu atinje ida-ne’e, Timor-Leste presiza diversifika ekonomia hodi fó prioridade atu bele kapasita sidadaun sira iha vida polítika nasional, hodi akompaña mós situasaun internasionál no hala’o diplomasia ida-ne’ebé ativa liu, efikáz liu, tuir objetivu estratéjiku nasionál.

Tanba familia sira halibur malu hela ba simu Tinan Foun, Prezidente Repúblika hato’o rekoñesimentu no agradesimentu ba kompatriota hotu-hotu, feto no mane, ne’ebé halo parte liña frente hanesan pesoál saúde, forsa defeza no seguransa no mós responsável husi estrutura hotu-hotu ne’ebé hala’o servisu relasiona ho prevensaun no kontrola ba COVID-19.

Prezidente Repúblika agradese ba apoiu hosi País belun sira-ne’ebé halo doasaun vasina hasoru COVID-19 nian no fó apoiu sira seluk, no agradese mós ba organizasaun naun governamentál ONG) ne’ebé fó mós apoiu ba Timor-Leste ninia kampaña rasik atu prevene no kombate moras COVID-19.

“Kompatriota sira, feto no mane, hatudu responsabilidade aas ho sira-nia komportamentu síviku di’ak.  Ida-ne’e fó orgullu boot ba Prezidente Repúblika no ba ita hotu,” nia dehan.

Molok tinan 2021 ramata, nia dehan, mosu tan fali variante foun ida COVID-19 hanara Omicron    ne’ebé da’et lalais de’it maibé Timor-Leste la rona ema mate naba-naban no seidauk hatene bainhira mak pandemia COVID-19 ne’e hotu.

Tanba ne’e, Timor-Leste tenke haforsa kapasidade atu halo planeamentu no organiza lojístika, tenke tau atensaun liután ba sistema saúde, sistema edukativu no oinsá hasa’e empregu no hadi’ak kondisaun moris família ho traballadór sira-nian.

“Buat aat barak akontese iha tinan 2021. Ho laran taridu mak ha’u simu informasaun katak veteranu rejistadu atus haat ualu nulu resin lima (485) mak mate iha tinan ida ne’e, hahú husi fulan Janeiru. Veteranu ida, istória ida! Ita la hatene se sira nia istória tama ona iha istória koletiva.

Maibé iha tinan 2021, Timor-Leste simu mós notísia di’ak tebes ida katak iha 14 novembru 2021 liubá, Timor-Leste nia tais tradisionál hetan rekoñesimentu internasionál hosi UNESCO, nu’udar riku-soin ida ba umanidade tomak.

“Nune’e, importante tebes katak iha investimentu makaas liután hosi ita-nia Governu atu haburas indústria tais iha Timor-Leste,” Xefe Estadu ne’e hateten.

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here