Vensedór/a Festivál Nasionál Arte no Kultura, Muzika Rezisténsia; Renizia da Costa Neves (primeiru-lugar), Efigenia Z. Fernandes (segundu-lugar), Nikel dos Santos (Terseiru-lugar), Amancia J. de Araújo (kuartu-lugar), Lamberto T. dos Santos (Kintu-lugar), Adriano (sextu-lugar) no Isamara P. C. F. Alves (favoritu). Imajen/Mísia PR.

DILI, 31 dezembru 2021 (TATOLI)—Prezidente Repúblika, Francisco Guterres Lú Olo, hateten festivál Nasional Arte no Kultura liuhosi Kompetisaun Múzika Rezisténsia ne’e atu promove talentu no afirma valór rezisténsia hanesan nasionalizmu no patriotizmu neebé refleta iha liafuan ka letra múzika ida-nian.

Notísia Relevante: Renizia Neves sai primeiru lugar iha festivál múzika rezisténsia 2021

Prezidente Repúblika, Francisco Guterres Lú Olo, entrega prémiu ba vensedora Festivál Nasionál Arte no Kultura, Muzika Rezisténsia; Renizia da Costa Neves (primeiru-lugar). Imajen/Mísia PR.

“Ita-nia esperiénsia iha luta naruk ba libertasaun nasional hatudu katak múzika nu’udar arma prinsipál ida iha luta hasoru okupasaun Indonézia. Múzika sai forsa boot atu espresa ideia kontra injustisa. Liuhosi múzika timor-oan sira espresa sira-nia rezisténsia, iha ai-laran, vila no diaspora. Liuhosi múzika timor-oan espresa sira-nian sentimentu opresaun, tristeza, maibé mós sira-nia korajen atu luta nafatin ho esperansa atu manan,” Prezidente Repúblika hateten iha nia diskursu enseramentu festivál Nasionál Arte no Kultura, Kompteisaun Múzika Rezisténsia, ne’ebé Agência Tatoli asesu, sesta ne’e.

Iha kompetisaun kanta múzika rezisténsia nian ne’e hahú motiva joven sira atu reflete sentidu hosi múzika ida-idak hodi sunu no inspira foinsa’e sira nia espíritu patriotizmu no nasionalizmu iha era pruenxe kun rasik-an.

Manan-na’in sira hasai retratu hamutuk ho Prezidente Repúblika, Francisco Guterres Lú Olo. Imajen/Mísia PR.

Aprezentasaun múzika rezisténsia hanesan mós dalan ida hodi kontinua hatutan valór sira-ne’ebé éroi funu-na’in sira husik hela, valór sira-ne’ebé orienta sira-nia hahalok durante tempu luta naruk to’o Timor-Leste hetan independénsia hanesan espíritu sakrifísiu, dedikasaun, brani, determinasaun, onestidade, domin ba Pátria no Povu no mós espíritu solidariedade ba malu.

“Valór sira-nee mak tenke kontinua nafatin dada dalan ba ita, liu-liu ba joven sira, iha prosesu ba dezenvolvimentu nasionál,” Xefe estadu ne’e hateten.

Timor-Leste hanesan nasaun independente, timor-oan sira iha responsabilidade hodi hametin no haburas prinsípiu no valór kulturál timor-oan sira nian no Timor-Leste iha nia prinsípiu no valór ne’ebé forma povu no nasaun ida.

Prinsípiu no valór kulturál sira-ne’e mai kedas hosi bei’ala sira, valór rezisténsia nian ne’ebé patriota sira defende no kaer metin hodi luta ba ukun rasik-an no valór ne’ebé mai hosi Igreja Katólika ne’ebé hola parte integrante iha forma konjuntura própria identidade Timor-Leste nian.

“Ha’u nu’udar Prezidente Repúblika iha mehi hakarak haree sosiedade ida moris iha País Timor-Leste ho ninia identidade rasik. Atu alkansa país ida ho sosiedade ida ho ninia identidade rasik, ita presiza esforsu boot ida hodi bele dezenvolve valór sira-neébe ita fiar no kaer metin ba,” nia dehan.

Ekipa juri hasai retratu hamutuk ho Prezidente Parlamentu Nasionál, Aniceto Longuinhos Guterres Lopes. Imajen/Mísia PR.

Timor-Leste presiza dezenvolve nia an nu’udar Estadu no nu’udar Nasaun, tanba dezenvolvimentu la’ós de’it kona-ba harii infraestrutura fízika no ekonomia maibé importante mós dezenvolve setór sosiál hanesan arte no kultura nu’udar prova katak Timor-Leste iha ninian karáter no sivilizasaun rasik, nunee mós hanesan prinsípiu no valór hodi reflete indentidade povu no nasaun ida-nian.

Tanba ne’e, festivál no kompetisaun nuu’dar forma ida hodi promove no prezerva valór kulturál sosiedade ida-nian hodi asegura katak patrimóniu kulturál povu no timor-oan nian moris ba nafatin hosi jerasaun ba jerasaun.

Prezidente Repúblika hateten, joven sira-ne’ebé sai vensedór iha tinan kotuk. Aprezentasaun múzika rezisténsia hosi artista no manan-na’in joven sira, sei hamanas timor-oan sira-nia nasionalizmu no patriotizmu.

“Ha’u hein katak partisipante sira, sei haburas liután sira-nia relasaun amizade, ho interrese komún atu haburas ita-nia kultura ba beibeik,” Lú Olo hateten.

Tanba iha kompetisaun ida-nee, balun sei simu Tasa Prezidente Repúblika nu’udar rekoñesimentu ba sira-nia nia talentu espesiál, maibé iha kompetisaun ne’e laiha ema ida mak  lakon maibé hotu-hotu manán ho esperiénsia ida-ne’e.

“Ita hein katak kompetisaun arte no kultura bele dudu Governu no entidade sira seluk atu halo investimentu boot iha industria hahú kedas hosi eskola ba arte hodi dezenvolve talentu foinsa’e sira-nian, infraestrutura ba dezenvolvimentu arte nian no ikus mai bele sai produtór ba arte no kultura, la’ós sai pasivu hodi konsume de’it produsaun hosi rai-li’ur nian,” nia dehan.

Notísia Relevante: PR prezerva múzika rezisténsia liuhosi festivál

Jornalista : Nelson de Sousa

Editór      : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here