Prezidente da Republika Francisco Guterres Lu Olo tau aifunan iha Estatu Heroi Nasional Prezodente Nicolao Lobato ba dala 43 hodi fo omenajen ba nia mate iha luta libertasaun nasional, semonia nee halao iha rotunda Nicolao Lobato Komoro, sesta 31/12/2021.Imajen Tatoli/Antonio Goncalves

DILI, 31 dezembru 2021 (TATOLI)—Prezidente Repúblika, Francisco Guterres Lú Olo, hateten Saudozo Nicolau Lobato, promete tinan tolu antes 1978 katak sei mate ho kilat iha liman hodi funu hasoru inimigu nune’e bele liberta povu no nasaun.

Saudozo Nicolau Lobato mate iha kampu batalla iha tinan 1978 iha Mindellu, Postu Administrativu Turiskai Munisípiu Manufahi hasoru militár Indonézia.

“Biar inimigu hale’u metin tiha fatin ne’e no halo atake maka’as tebes, Prezidente Nicolau Lobato hamutuk ho aswa’in sira seluk reziste ho barani no determinasaun to’o mate,” Francisco Guterres Lú Olo, konta tuir bainhira komemora loron Nasionál Eroi sira ba dala 43 iha Rotunda Prezidente Nicolau Lobato, Comoro, Dili, ohin.

Timor-Leste presiza valoriza istoria pasadu no hatene tanbasá?  importante tebes hodi hatene eroi feto no mane sira ne’ebé husik hela sira nia ain-fatin no kontribui ba hakerek ita-nia istória koletiva, nu’udar povu ida ho identidade rasik, livre no independente.

PR Lú- Olo haktuir katak bainhira ita tetu kle’an ita-nia istória luta organizada hahú kedas husi tinan 1974, no saida maka Prezidente Nicolau Lobato halo hahú kedas husi loron proklamasaun independensia unilaterál 28 novembru 1975 hodi hametin rejisténsia povu nian hasoru inimigo.

“Ohin ha’u hakarak lori kompatriota sira hotu, liuliu jerasaun foin-sa’e, atu   komprende tanbasá Nicolau Lobato sai figura boot ida ne’ebé Povu hadomi, biar nia lidera ita-nia luta libertasaun nasionál durante períodu badak ida. Ohin loron ita país soberanu no independente, ho rekoñesimentu husi komunidade internasionál. La too tinan ualu nulu liubá, país ida husi Europa mak okupa hela   ita- nia territóriu tomak. País ida husi Ázia mós tama mai ho forsa militár boot no ita hetan jenosídiu dahuluk iha ita-nia istória. Ita mós sai vítima ba Segunda Guerra Mundiál,” Lú Olo hateten.

Nia dehan, hafoin funu mundiál da ruak, Portugal okupa Timor-Leste, no foin to’o tinan 30 de’it akontese kazu levantamentu Manufahi ne’ebé lidera husi Dom Boaventura.

Tanba ne’e, durante kolonizasaun Portugues, Timoroan sofre iha situasaun oioin, maibé nunka lakon identidade nu’udar Timoroan.

“Ita la muda tanba identidade ne’e la’ós hari’i iha loron ida ka rua, maibé iha tempu naruk.  Jerasaun tuituir malu mak hametin ba beibeik. Tebes duni katak tempu la sobu buat ne’ebé hari’i ho tempu. Identidade ida ne’ebé ita hari’i metin durante tinan atus ba atus mak tanen ita-nia kapasidade rezisténsia atu hasoru no hakaat difikuldade ne’ebé de’it iha ita-nia luta libertasaun nasionál,” Lu Olo hateten.

Atu harii futuru Timor-Leste ida di’ak liu, dahuluk tenke koñese no valoriza ita-nia pasadu liliu  fó valór ba Eroína no Eroi sira hodi inspira no sai matadalan Timoroan ba hari’I futuru Timor-Leste ida nabilan.

“Eroína no Eroi sira husik hela sira-nia ain fatin, liuhusi sira-nia hahalok no hanoin sira husik mós marka iha ita hotu nia vida, sira hatudu mós dalan ba futuru, husi família ho valór kristaun, Nicolau halo nia estudu iha Soibada, iha koléjiu ida ne’ebé nia aman, Sr. Narcisio simu formasaun nu’udar profesór katekista,” tenik tan.

Nicolau Lobato hatudu ninia kualidade nu’udar ema ho vontade di’ak, estudiozu, dixiplinadu, determinadu no abnegadu, umilde ne’ebé gosta aprende husi kompatriota sira seluk no prontu atu fó nia-an tomak ba kauza justa.

Nicolau Lobato assume hela kargu nu’udar Prezidente FRETILIN, Prezidente Repúblika no Komandante en-Xefe FALINTIL bainhira tiru malu ho inimigu no mate iha 31 dezembru 1978.

Ninia esperiénsia nu’udar aswa’in no líder hodi hakle’an liután ninia konviksaun patriótika hahú durante períodu kolonizasaun portugeza.

Nicolau Lobato husik ninia legadu eskritu ne’ebé fó-sai ninia fiar tomak ba Povu. hodi hatete lia fuan murak “A nossa Vitória é uma questão de tempo”. Nia fiar Katak loron ruma ita sei manán! Ita manán duni biar lori tempu naruk.

Husi Prezidente Nicolau Lobato, eroína no eroi sira, sai lisaun ba Timoroan atu afirma an, korajen hodi hasoru adversariu, korajen atu rejiste, ispíritu patriótiku metin liután to’o manán funu.

”Ha’u bele hatete katak ita-nia identidade hametin liután, ita hatuur-an nafatin nu’udar Timoroan,”Prezidente Repúblika dehan.

Jornalista: Tomé Amado

Editór : Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here