Saudozu Prezidente Repúblika Nicolau dos Reis Lobato kaer hela toa iha liman no atuál Prezidente CNRT, Xanana Gusmão, kaer kamera hamriik iha sorin karuk. Imajen/Esepsiál.

DILI, 31 dezembru 2021 (TATOLI)–Xanselér (Canceler) Arkidioseze, Padre Paulus Maya, hateten iha ámbitu ukun rasik-an ne’e presiza éroi foun ida-ne’ebé tenke sakrifika nia an ba servisu hodi hala’o servisu ho fuan no laran ba nasaun nia di’ak, progresu, dezenvolvimentu no ba povu nia di’ak.

Notísia Relevante: “Hanoin Nicolau Lobato nia mate hodi kontinua luta ba liberta povu”

“Ida ne’e tenke sai fali éroi foun. La’ós ita tenke luta kaer kilat halo funu, la’e. Maibé, itania hakarak di’ak atu servisu, hakarak di’ak atu sakrifika no hakarak di’ak atu dedika an tomak ba ema hotu nia di’ak. Ida-ne’e mak tenke sai fali prinsípiu foun ida ba itania luta ba dezenvolvimentu iha itania rain,” Pe. Paulus Maya hateten ba Agência Tatoli, hafoin prezide misa ba selebrasaun Loron Nasionál Éroi iha Igreja Motáel, Dili, kinta ne’e.

Tanba ne’e, nia husu ba joven sira tenke aprende hosi maluk éroi no matebian sira-ne’ebé sakrifika an no fó ona sirania moris hodi mate ba rai ida-ne’e.

“Ohin loron ita bele goza, haksolok no ita bele lakon tempu ba buat ne’ebé util, maibé keta haluha katak antes ita atu goza buat hirak ne’e iha ema balun sakrifika ona sira nia moris ba ida-ne’e. Tanba ne’e, joven sira presiza aprende no hahú ohin kedas aprende hodi hatene sakrifika, aprende estuda hosi esperiénsia moris itania luta-na’in sira-ne’ebé uluk luta tiha ona ba itania ukan an, nune’e ita ka’er fali misaun foun ida mak itania luta agora. Luta ba dezenvolvimentu no luta ba prosperiedade iha itania rain, ida ne’e importante,” nia enkoraja.

Amululik ne’e hateten, Loron Nasionál Éroi nu’udar loron importante ida, nune’e Governu presiza tau atensaun ba vítima luta sirane’ebé fó an ba mate hodi bele manan ukun rasik an ida-ne’e.   

“Governu presiza tau atensaun nafatin ba itania maluk sira ne’ebé vítima ba luta, liuliu sira-ne’ebé oras-ne’e abandonadu, sira-ne’ebé la rekoñese, moras no sira-ne’ebé hela fatin laiha. Tanba, sira mak ita bele ukun an no ita bele goza. Nune’e keta haluha sirania luta, tanba sirania sakrifisiu ne’e boot tebestebes. Liuhosi sira brani fó an tomak ba ita, tanbasá ita labele halo buat ruma. Maske kiik maibé utíl ba sirania moris no sirania familia, ida ne’e importante,” nia dehan.

Governu tenke tau matan nafatin tanba dezenvolvimentu ne’e tenke la’o nafatin ba oin, nune’e Governu labele tauk atu investe makaas iha setór edukasaun hodi forma juventude hodi bele muda Timor-Leste.

Igreja, tuir nia, labele nega ema hotuhotu ne’ebé luta ba ukun rasik an, liu-liu ba sira-ne’ebé saran ka sakrifika ona sirania moris ba ukun rasik an ida ne’e, katak ema sira-ne’e martir tanba sira brani fó sirania an ba ema barak nia di’ak.

“Ida ne’e sakrifisiu ida ne’ebé extraordinária no sentidu domin ida-ne’ebé boot tebes, tanba ema ida brani fó nia an ba mate tanba ema seluk nia moris. Ida-ne’e domin ida boot liu ne’ebé ita na’in Jesus Kristu rasik halo ida-ne’e. Tanba ne’e, heroi sira ne’e, igreja klaru rekoñese ne’e hanesan martir ida-ne’ebé fó nia an tomak ba ema seluk nia di’ak,” amu ne’e hateten.

Notísia Relevante: Loron Nasionál Éroi: Nicolau Lobato Mak Povu Nia Lider

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here