Abitante iha mota-ibun Ponte Comoro III sai vitima ba impaktu inundasaun iha domingu (04/04). Imajen TATOLI/António Gonçalves.

DILI, 31 dezembru 2021 (TATOLI)—Koordenadór Dirasaun Nasionál Jestaun Risku Dezastre, Helio de Sousa Soares Paicheco, hateten Governu liuhosi Sekretaria Estadu Protesaun Sivíl (SEPS) apoia vítima dezastre naturál hamutuk 42 iha munisípiu Dili.

Notísia Relevante: MOP identifika estragu 117 impaktu hosi dezastre naturál

Nia hateten, apoia ne’e ba vítima sira-ne’ebé mak hetan dezastre naturál iha fulan janeiru to’o agostu, liu-liu hanesan anin sobu uma no ahi han uma.

“Ohin 30 dezembru, Sekretaria Estadu Protesaun Sivíl, liuhosi Dirasaun Nasionál Jestaun Risku Dezastre halo pagamentu ba itania maluk vítima dezastre naturál hamutuk 42 iha Dili. Tanba, durante ne’e ami foti dadus idaidak rai hamutuk no ohin Governu bele responde ona,” Koordenadór Dirasaun Nasionál Jestaun Risku Dezastre, Helio de Sousa Soares Paicheco, informa ba Agência Tatoli iha nia kna’arfatin Bemori, Díli.

Hosi vítima dezastre naturál hamutuk 42 ne’e SEPS tau iha kategória rua, hanesan kategória estraga totál no estraga kman.

“Hosi estraga kman, Governu apoia kalen 50 no orsamentu ba konstrusaun hamutuk $150. Ida estraga totál ne’e, ita iha orsamentu hamutuk $368 ho kalen 50, sementu 25, besi 22, pregu, inklui arame ba uma nia,” nia afirma.

Entretantu, pagamentu ba vítima dezastre naturál hamutuk 42 iha munisípiu Dili, kompostu hosi Postu Administrativu Cristo Rei 20, Na’in Feto lima (5), Vera Crúz haat (4), Dom Aleixo 12 no Metinaro na’in-ida (1).

Notísia Relevante: Governu Brazil kontribui $120.000 ba Timor-Leste tulun vítima dezastre naturál

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here