Komandante PNTL Munisípiu Baucau, Superintendente António Maria de Sá. Imajen/Eugénio Pereira.

BAUCAU, 31 dezembru 2021 (TATOLI)—Superintendente Xefe Polisia António Maria de Sá, sesta ohin ofisialmente subtitui Komandante Polisia Munisípiu Baucau, Superintendente Polisia Armando Monteiro.

Komandante PNTL Baucau foun, Superintendente Xefe António Maria de Sá, informa orgullu bele lidera PNTL iha ninia rai rasik bainhira envolve iha instituisaun PNTL durante tinan 20 nia laran.

“Ne’e la’os prezente natal maibé responsabilidade bo’ot ne’ebé mak komando depozita mai ha’u,” Superintendente Xefe António hateten iha Villa nova,sesta ohin.

Nia kompromete sei kolabora no konsolida ho entidades hotu liliu autoridade Munisipál tantu sivil no militár, Igreja, veteranu, sosiedade sivil, joventude no komunidade jerál.

Eis komandante PNTL Covalima hatutan atu dezenvolve Munisípiu ne’e, save maka presiza rona malu, kolabora, respeita malu no servisu hamutuk entre lider komunitaria, igreja, sosiedade sivil, to’o autoridade Munisípiu.

“Ha’u mai para serví fali inan-aman sira iha ne’e kompletamente hatudu identidade hanesan Baucau oan,” António hateten.

Antes ne’e,  Komandante Munisípiu Baucau ne’e, assume kna’ar nu’udar komandante Unidade Intervensaun Rapida (UIR) durante tinan-haat, responsavel rekursu umanu tinan ida-resin iha kuartél jerál, assume kargu hanesan Korpu Seguransa Pesoál (CSP,sigla Portugés) no kontinua falli  nu’udar ofisiál internasionál Polísia durante tinan-3.

António mós durante tinan neen resin haknar aan iha Casa militar Palasiu Prezidente Republika durante mandatu Eis Prezidente Repúblika, Taur Matan Ruak, no ikus assume kargu nu’udar komandante PNTL Munisípiu Covalima.

“Sai komandante ita bele orgullu maibé mós sai vitíma, urgullu tanba serví ita-nia rai maibé pozisaun laiha valór tanba agora daudaun ita halo sakrifisiu mak barak,” António argumenta.

Iha tempu hanesan Komandante Munisípiu Baucau sesante Superintendente Armando Monteiro,  dehan mudansa servisu iha institusaun  ne’e normal, no tenke obedese maibe labele rezeita tanba ne’e,  husu nafatin ba membru Polisia no ema hotu-hotu atu kontribui ba paz iha Baucau.

Hahú hosi jullu 2020 to’o ohin, halo ona erforsu lubuk ida hodi redúz krime iha Munisípiu ne’e. Alende ne’e, servisu hamutuk ho parte hotu-hotu liliu Igreja hodi hakbesik Instituisaun PNTL liga ho vida ispirituál.

Ezekutu planu kontizensia kunjuntu hosi Xefe estadu Maior jenerál Falintil-FDTL no Komandante Jerál PNTL ne’ebé fó sai liuhosi despaixu númeru 17 fevereiru 2019 hodi harii Servisu Komando Konjunta operasaun koordenada (SKKOK) iha Baucau.

Koordena mos ho lider juventude iha Baucau liuliu envolve iha seguransa hodi asegura estabilidade ba komunidade no minimiza konflitu entre grupu arte marsiál.

Durante ninia mandatu tinan ida resin iha Baucau, konsege kompleta mós Ofisial Polísia Suku (OPS) iha Suku 59, iha  Postu Admistrativu neen hodi servisu hamutuk ho autoridade Suku liuliu koordena ho komunidade iha aspeitu estabilidade seguransa Suku.

Nia relata, servisu ne’ebé maka la konsege rezolve maka kazu disputa baliza entre Suku Lelalai Postu Quelicai ho Suku Uaibobo Postu Osso Munisípiu Viqueque no disputa baliza entre suku Namanei ho Aldeia Soba Suku Boleha postu Laga.

Alende ne’e, kazu disputa rai entre Suku Uailaha ho Uaioli Postu Venilale ne’ebé mak internalmente hahú rezolve mezmu seidauk solusiona no dezentendementu entre komunidade iha Suku Tirilolo relasiona investementu Simente iha Caisido.

“Ida-ne’e mak problema haat ne’ebé ha’u husik hela iha ne’e, hau husu komandante atu kontinua no solusiona,” Armando akresenta.

Armando Monteiro ba entidades hotu-hotu ne’ebé kolabora no kontribui ba garante estabilidade iha Munisípiu Baucau durante 2020 to’o 2021.

Jornalista : Natalino Belo

Editór : Agapito dos Santos

PUBLISIDADEiklan

HAKEREK NO HATÁN

Please enter your comment!
Please enter your name here