Rai halai impaktu hosi rai nakdoko ne’ebé akontese horikalan rezulta natar no estrada iha postu Venilale nakfera. Imajen espesiál.

BAUCAU, 30 dezembru 2021 (TATOLI) –  Rai nakdoko ne’ebé akontese ohin, madrugada pur-volta 03:00 rezulta rai halai iha suku Uailaha no Baduho’o, postu administrativu Venilale, munisípiu Baucau.

Administradór postu administrativu Venilale, Miguel Mendes Guterres, hateten, rai nakdoko ne’e rezulta rai nakfera no monu iha suku Uailaha no Badoho’o ne’ebé dadaun ne’e parte autoridade iha ona terrenu atu halo identifikasaun.

Rai halai impaktu hosi rai nakdoko ne’ebé akontese horikalan rezulta natar no estrada iha postu Venilale nakfera. Imajen espesiál.

“Rai halai ne’e, estrada fera, maizumenus iha Baduho’o aldeia Umanaiku nian, iha fali Uailaha, aldeia Caubai nian, rai fera ne’e pur-volta kilómteru 4,” Admistradór postu administrative Venilale, informa ba Agência TATOLI, liuhosi telefónika, kinta ne’e.

Hosi akontese ne’e fó risku ba komunidade nia uma hela hamutuk-lima, uma adat-rua, ai-riin eletrisidade inklui natar komunidade nian, ne’ebé pertense ba suku Uailaha, aldeia Caubai.

Nune’e mós iha estrada diresaun suku Baduho’o nian ne’ebé nakfera difikulta movimentu trasporte públiku.

Xefe suku Baduho’o, Marcos António Ximenes, hateten rai nakdoko rezulta rai nakfera no halai nune’e fó risku ba komunidade nia hela fatin balun, natar no estrada hetan estragu.

“Iha-ne’e afeta mós ba natar, to’os, estrada, uma (hela fatin) uma lisan, iha aldeia rua ne’e estragu dalan atu ba sede suku mós ladi’ak hotu,” António akresenta.

Ekipa hosi servisu munisipál protesaun sivil no dezastre naturál Baucau hamutuk ho servisu munisipál agrikultura, autoridade postu no suku daudaun ne’e verifika hela dadus kona-ba akontesimentu ne’e.

Entretantu raio nakdoko ne’ebé akontese iha oras 03:00-resin madrugada halo komunidade iha Baucau paniku no halai sai. Sentru rai nakdoko iha Maluku, Indonezia ho magnitude 7.4.

Jornalista         : Natalino Belo

Editór               : Evaresto Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here