Autoridade RAEOA-BNCTL selebra akordu ba fundu empréstimu hamutuk millaun $60. Imajen/mídia ZEEMS.

OÉ-CUSSE, 30 dezembru 2021 (TATOLI) – Autoridade Rejiaun Administrativa Espesiál Oé-Cusse Ambeno (RAEOA) depozita millaun $60 iha Banku Nasionál Timor-Leste (BNCTL, sigla portugés), hodi fasilita emprezáriu, funsionáriu no komunidade sira halo empréstimu dezenvolve setór ekonómi iha rejiaun ne’e.

Kooperasaun ne’e Autoridade Rejiaun Administrativa Espesiál Oé-Cusse Ambeno (RAEOA) ho Banku Nasionál Timor-Leste, selebra iha kinta ne’e ho objetivu fasilita emprezáriu, funsionáriu no komunidade sira hodi bele asesu hodi dezenvolve setór ekonómi iha rejiaun ne’e.

Prezidente Autoridade RAEOA, Arsénio Paixão Bano, informa, fundu millaun $60 ne’e mai hosi fonte likidés saldo jerénsia, tanba osan ne’e la inklui iha planu orsamentasaun iha tinan oin, nune’e autoridade deside depozita iha banku BCNTL sukursál Oé-Cusse ho durasaun tinan ida.

Nune’e ho fundu ne’e bele fasilita emprezáriu, funsionáriu inklui komunidade sira bele asesu hodi dezenvolve setór ekonómi liuhosi empréstimu, tanba nia funan kiik 6% nune’e nia funan bele tama ba RAEOA hodi ba dezenvovimentu rejiaun ne’e.

Ho selebrasaun ne’e, Prezidente Autoridade RAEOA, Arsénio Paixão Bano, agradese tanba RAEOA iha parseiru di’ak ho BNCTL.

“Ha’u hanoin inisiativa ne’e sei sei dudu setór iha nivél hotu-hotu, grupu, emprezáriu, inklui funsionáriu sira atu aproveita, ho kooperasaun ne’e, ha’u hein katak progresu hatudu iha ita-nia rejiaun, neneik sei rezolve problema sosiál sira, ha’u fiar kooperasaun ne’e sei ajuda dezenvolvimentu iha Oé-Cusse,” nia informa ba Agência Tatoli iha edifísiu ZEESM, Oé-Cusse.

Prezidente Konsellu Administrasaun BNCTL, António Victor, hateten, kooperasaun ne’e atu kontinua prezensa BNCTL nian iha RAEOA.

“Dezde mikro-finansa nia tempu to’o mai BNCTL, maibé ho disponibilidade fundu hosi RAEOA ne’e marka pasu importante ba parte rua, tanba futuru sei iha projetu barak, nune’e fundu ne’e mais produtiva iha nia efeitu multiplikadór ne’ebé barak, liuliu ba komunidade,” nia katak.

Nia fó-sai katak, ho fundu ne’ebé autoridade depozita sei ajuda dezenvolvimentu iha Oé-Cusse, tanba RAEOA konsiderasaun espesiál ba BNCTL, nune’e iha futuru sei goza espesialidade lubuk ida, la’os hanesan BNCTL aplika iha rai boot.

Jornalista         : Abílio Elo Nini
Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here