Peskadór hosi aldeia Sulilaran, suku Aidabaleten, postu administrativu Atabae, munisípiu Bobonaro, Silvino Gusmão. Imajen Tatoli/Sérgio da Cruz.

BOBONARO, 30 dezembru 2021 (TATOLI) – Peskadór sira iha aldeia Sulilaran, suku Aidabaleten, postu administrativu Atabae, munisípiu Bobonaro husu Governu apoia konjeladór hodi konserva ikan nune’e distribui ba merkadu lokál.

Peskadór Silvino Gusmão, hateten, governu presiza apoia tanba iha fulan-dezembru ne’e, liuliu tempu udan rezultadu peska sa’e maka’as maibé fatin ne’ebé atu rai ikan la sufisiente.

“Ikan ne’e ami tama peska maibé kliente sira hola la hotu, entaun ne’e soe estraga ona tanba laiha jeleira rai ikan nian, ne’ebé sé bele Governu hanoin netik ajuda ami fatin rai ikan nian,” nia informa ba Agência Tatoli, iha Sulilaran, kinta ne’e.

Razaun husu apoia ba governu kona-ba konjeladór ikan, tanba rendimentu kada loron sira hetan balun atende ba nesesidade uma-laran, ba oan sira-nia eskola no balun prepara halo manutensaun ba ro.

Nia haktuir, iha fulan-dezembru ne’e ikan ho tipu sardina sa’e maka’as nune’e loron ida peskador sira bele kaer ikan to’o ró haat ka lima ba leten no fa’an ba kliente sira ikan 15  ho folin $1 dolar no kada masa-mutin ‘Kunci Mas’ ne’e ida $20 ka $25, maibé depende ba tempu.

“Kuandu udan hanesan ne’e tasi merak entaun ikan sa’e makas, kliente sira mós mai barak, sosa ikan ro tolu too haat. Ami bele hetan ró ida $300 to’o $350, dalaruma sorte di’ak ne’e ami dada mak to’o labele deit, maibé osan ne’e ami sei fahe malu, tanba la’ós ida mesak mak tama,” nia katak.

Enkuantu peskadór Agostinho Maia, reforsa, governu presiza apoia konjeladór nune’e ikan labele soe estraga.

Peskadór hosi aldeia Sulilaran, suku Aidabaleten, postu administrativu Atabae, munisípiu Bobonaro, Agostinho Maia. Imajen Tatoli/Sérgio da Cruz.

“Kliente sira-ne’e hela dook balu mai Dili ho karreta no Maliana ho motorizada, sira tuur hein ami tama kore redi dalaruma oras tolu ka haat hanesan mak foin ami sai. Kuandu udan, sira hein to’o malirin,” nia katak.

Maske Governu seidauk apoia konjeladór maibé  iha 2020 ne’e governu apoia ona roo kiik unidade lima ba grupu peskadór lima ho membru na’in-15 no kada grupu ema na’in-lima.

“Ró ne’e ami la hetan, maibé maluk balun mak hetan to’o oras ne’e uza tama tasi hela, ami-nian halo rasik de’it, maibé ami ba  kréditu fali osan iha BNCTL sosa mákina Jonson mai monta hodi buka ikan iha tasi,” nia haktuir.

Jornalista         : Sérgio da Cruz

Editór               : Evaristo Soares Martins

PUBLISIDADEiklan

HAKEREK NO HATÁN

Please enter your comment!
Please enter your name here