Negosiante merkadu lokál aldeia Miguir, suku Aidabaleten, postu administrativu Atabae, munisípiu Bobonaro, Evalina de Jesus, tau modo ba plástiku fó ba kompradór. Imajen Tatoli/Sérgio da Cruz.

BOBONARO, 30 dezembru 2021 (TATOLI) – Negosiante merkadu lokál iha aldeia Miguir, suku Aidabaleten, postu administrativu Atabae, munisípiu Bobonaro hetan rendimentu di’ak durante selebrasaun Natál tinan 2021 nian.

Negosiante Evalina de Jesus, sente kontente durante selebrasaun Natál tanba movimentasaun komunidade nia iha kapital Dili ba munisípiu ho volume ne’ebé boot kompara ho loron bainbain.

“Ami-nia modo sira-ne’e loron bainbain loron ida kada vez ema hola  $20, dalaruma $15 de’it, mais foin lalais atu tama Natál nian to’o agora ami sente osan tama di’ak loos, tanba loron ida ema bele sosa to’o $50, dalaruma rame ne’e bele liután, ami fiar tinan foun hotu mós sei hetan barak,” nia informa ba Agência Tatoli, iha Miguir, kinta ne’e.

Ho rendimentu di’ak ne’e Evalina de Jesus sente kontente, tanba antes ne’e Governu implementa Estadu Emerjénsia (EE) no impoin serka sanitária iha munisípiu Bobonaro halo atividade negósiu paradu durante fulan-lima, sein rendimentu.

“Durante  Covid-19 ami la hetan osan, tanba ema laiha, foin fulan rua ba kotuk ne’e mak osan foin tama di’ak, maibe loron ida hetan de’it $20 to’o $30,” nia informa.

Produtu lokál ne’ebé negosiante sira fa’an iha baraka mak hanesan, pipinu, baria, brinjela, ai-dila fuan, fore sikoti, hudi, tomate, ai-manas, modo-mutin, kanku no produtu sira seluk.

Nune’e mós negosiante Maria Alves, hateten, produtu lokál hirak-ne’e maioria kuda iha kintál rasik no balu sosa fali hosi to’os na’in sira iha suku no aldeia viziñu ne’ebé iha poténsia produtu agríkola.

“Ida ami mak kuda de’it osan tama loos de’it, mais sosa fali ne’e mak ladún, ami hola modo ho ai-fuan, ema liu ba mai sempre sosa, modo ami faan ne’e mós fresku,” nia katak.

Nia haktuir, antes ne’e produtu lokál ladún folin di’ak tanba merkadu ne’ebé governu estabelese ba sira iha tinan hirak liu dook husi estrada halo komprador sira fihir liu de’it.

Entretantu totál negosiante ne’ebé halo negósiu iha fatin refere na’in-10, maioria feto, orijen hosi aldeia Miguir, suku Aidabaleten.

Jornalista         : Sérgio da Cruz

Editór               : Evaristo Soares Martins

PUBLISIDADEiklan