Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo. Imajen TATOLI/António Gonçalves.

DILI, 30 dezembru 2021 (TATOLI)—Ministru Asuntu Parlamentár no Komunikasaun Sosiál (MAPKOMS), Francisco Martins da Costa Pereira Jerónimo, husu ba ema-ne’ebé la’ós jornalista simu ona karteira profisionál atu entrega fila-fali ba Konsellu Imprensa (CI-sigla portugués), tanba só jornalista de’it mak iha direitu atu hetan karteira profisionál.

“Sira-ne’ebé la’ós jornalista maibé simu tiha ona karteira profisionál hosi Conselho de Imprensa (CI), ha’u husu di’akliu entrega fila-fali karteira profisionál ne’e ba iha nia fatin, nune’e ita bele dignifika jornalista no ita bele hateten só jornalista sira mak iha direitu atu hetan karteira profisionál ne’e,” Francisco Martins da Costa Pereira Jerónimo hateten ba Agência Tatoli, iha Salaun Sentru Nasionál Empregu no Formasaun Profesionál (CNEFP), Tibar, Liquiça, kuarta ne’e.

Karteira profisionál ne’e, nia dehan, jornalista mak iha direitu atu hetan maibé se realidade Conselho de Imprensa (CI) atribui hotu ba timor-oan no motorista balun haknar-an iha Rádiu Komunidade sira-ne’ebé nota bene la’ós jornalista ne’e, MAPKOMS sei husu atensaun ba Conselho de Imprensa atu haree.

Tanba ko’alia kona-ba jornalista ne’e ninia profisaun jornalista hodi hala’o atividade jornalizmu, nia mak iha direitu hetan kartaun profisionál maibé ema sira-ne’ebé la’ós jornalista ne’e nia labele simu karteira profisionál ne’e, nia tenke entrega hikas ba Conselho de Imprensa.

“Tanba, iha lei komunikasaun sosiál mós ko’alia kona-ba karteira profisionál ne’e ba jornalista sira,” nia esplika.

Karteira profisionál ne’ebé durante ne’e Conselho de Imprensa atribui ba jornalista sira-ne’e sei provizóriu hela tanba seidauk iha dekretu-lei ida-ne’ebé fó kbiit ba Ministru Asuntu Parlamentár no Komunikasaun Sosiál (MAPKOMS) aprova antes atribui ba jornalista sira.

“Kona-ba hasai dekretu-lei ba atribuisaun karteira profisionál, ne’e iha konsellu imprensa nia kompeténsia entaun CI mak tenke halo ezbosu ba dekretu-lei ida-ne’e, tanba ne’e CI tenke prepara ezbosu dekretu-lei atu aprezenta mai iha MAPKOMS,” nia hateten.

Antes ne’e, Prezidente Conselho de Imprensa informa ba Agência Tatoli katak jornalista hamutuk na’in-100 mak hatama fali ona karteira profisionál ba Konsellu Imprensa (CI-sigla portugués) tanba sai ona hanesan funsionáriu públiku.

Atribuisaun karteira profisionál ba ema hala’o atividade jornalístika

Antes ne’e, Prezidente Conselho de Imprensa (CI), Virgílio da Silva Guterres, konsidera atribuisaun karteira profisionál ba jestór iha Rádiu Komunidade sira iha Munisípiu sira ne’e tanba antes ne’e sira prenxe kritériu uluk.

“Ita fó la’ós hanesan Rádiu Komunidade, maibé hanesan sidadaun ne’ebé sai jornalista, tanba nia serbisu hanesan jestór no voluntáriu ba Rádiu Komunidade ne’e desizaun, maibé CI atribui karteira profisionál ne’e ba ema-ne’ebé hala’o atividade jornalístika,” Virgílio da Silva esplika.

Ba kestaun ne’e, Prezidente CI refere ba hirak ne’ebé la’ós jornalista maibé sidadaun ne’ebé hala’o atividade jornalístika.

“Hanesan iha Rádiu Komunidade, atu kondutór ka serbisu iha aeroportu ne’ebé de’it, bainhira nia halo atividade jornalístika hanesan ba halo kobertura, la sala buat ida bele hetan karteira profisionál. Ami fahe ne’e iha rua, ida ami fó hanesan ema jornalista profisionál no ida fó hanesan estájiu, tanba kritéria ne’ebé atu hetan karteira profisionál mak estájiu, ida-ne’e livre, sé mak halo estájiu iha mídia ida, nia bele hetan karteira estajiáriu, ne’e la presiza tuir ezame, maibé atu hetan profisionál mak tenke tuir ezame,” Prezidente CI esplika.

Lei Komunikasaun Sosiál, artigu 12 (Kapasidade) haktuir, bele sai nu’udar jornalista sidadaun maiór ne’ebé goza direitu sivíl tomak no ramata eskola ho pelumenú ensinu sekundáriu.

Tuir artigu 13 (Hala’o knaar) alinea 1 hateten nu’udar kondisaun hodi hala’o knaar jornalista, mak iha abilitasaun ho títulu rasik, hanaran karteira profisionál, ne’ebé Conselho de IMprensa halo no sei hafoun.

Iha alinea 2 haktuir, Governu aprova liuhosi dekretu-lei regulamentu karteira profisionál jornalista no jornalista estajiáriu sira-nian.

Alinea 3 hateten, to’o ba aprovasaun regulamentu ne’ebé temi iha númeru liubá, Conselho de Imprensa (CI) halo dokumentu provizóriu ida.

Iha alinea 4 dehan, sei rekoñese títulu profisionál sira jornalista nian ne’ebé halo tiha ona hosi rain estranjeiru no ninia portadór sira bele husu inskrisaun no emisaun títulu hosi Conselho de Imprensa, hodi dispensa estájiu profisionál.

Alinea 5 haklaken, laiha órgaun komunikasaun sosiál ida bele admite ka mantein ninia servisu nu’udar jornalista, sé mak la abilitadu ho títulu ne’e rasik.

Asesu ba profisaun

Iha artigu 16 hateten, atu hetan dalan ba profisaun nu’udar jornalista sei hahú ho estájiu obrigatóriu ida, ne’ebé ramata ho aproveitamentu, ho durasaun sanulu-resin ualu, fulan-sanulu-resin-rua no fulan-neen, ba sé mak iha ensinu sekundáriu rasik, lisesiatura iha área saida-saida  de’it no lisensiatura iha área komunikasaun sosiál.

Inskrisaun no títulu estajiáriu

Iha lei komunikasaun sosiál artigu 15 (Inskrisaun no titulu Estajuariu) iha alinea 1 hatete, estajiáriu tenke husu ninia inskrisaun no emisaun ba títulu rasik.

Alinea 2 haktuir, rekerimentu sei akompaña ho dokumentu hirak tuirmai:

a.) Deklarasaun komprovativu ba admisaun nu’udar estajiáriu iha órgaun ida komunikasaun sosiál, ne’ebé diretór asina, ho identifikasaun jornalista orientadór estájiu nian no númeru ba karteita profisionál ida-idak;

b.) Kópia dokumentu identidade; no c) Kópia sertifikadu abilitasaun literária.

Iha alinea 3 ne’e hateten, ttulu estajiáriu nu’udar dokumentu hodi halo identifikasaun jornalista estajiáriu nian no títulu abilitasaun bastante hodi hala’o atividade jornalístika.

Estájiu profisionál

Tuir artigu 16 iha alinea 1 haklaken, estájiu profisionál hala’o iha fatin ida órgaun komunikasaun sosiál nian, ne’ebé hodi hakle’an koñesimentu tékniku no linguístiku estajiáriu nian no ho nia rohan hodi fó ba nia koñesimentu kona-ba rejime jurídiku ba komunikasaun sosiál no direitu no devér ho natureza legál no étika ba profisaun jornalista.

Iha alinea 2 haktuir, jornalista ida ho esperiénsia tinan-lima liu iha profisaun ne’e, sei tuir estajiáriu, ne’ebé mak responsavel ba orientasaun estájiu.

Alinea 3 ne’e haktuir, estájiu iha komponente teóriku ida nomós komponente prátiku ida.

Alimea 4 ne’e hateten, iha estájiu nia laran, estajiáriu tenke halo pelumenús aktu no knaar hosi natureza jornalístiku lima hirak tuirmai:

a.) Redasaun, koordenasaun, eskolla ba títulu, integrasaun, koresaun ka koordenasaun matéria ne’ebé atu fó-sai iha komunikasaun sosiál, ne’ebé iha ka laiha komentáriu;

b.) Komentáriu ne’e ka krónika iha órgaun komunikasaun sosiál;

c,) Entrevista, inkéritu ka reportajen hakerek ka ko’alia iha komunikasaun sosiál;

d.) Planeamentu no organizasaun téknika servisu nian;

e.) Peskiza, rekolla, selesaun no tratamentu ba faktu, notísia, informasaun ka opiniaun no ninia preparasaun liuhosi testu, imajen ka lian hodi halo divulgasaun iha komunikasaun sosiál;

f.) Revizaun orijinál ba matéria jornalístiku no halo peskiza ba dadus ida-idak hodi halo notísia;

g.) Organizasaun no konservasaun hodi halo arkivu jornalístiku no peskiza ba dadus ida-idak hodi halo notísia;

h.) Fahe testu, fotografia ka ilustrasaun ho karáter jornalístiku hodi halo divulgasaun;

i.) Halo dezeñu artístiku ka tékniku ho karáter jornalístiku.

Iha alinea 5 esplika, órgaun komunikasaun sosiál halo sertifikadu ida bainhira ramata estájiu ho aproveitamentu, sertifikadu ne’e sei tau hamutuk ho dokumentu komprovativu sira ba hala’o aktu tuir natureza jornalístika ne’ebé temi tiha ona iha númeru liubá.

Aliena 6 hateten, estájiu ramata ho ezame ida, ne’ebé Conselho de Imprensa halo, iha ezame ne’e estajiáriu tenke hatudu koñesimentu kona-ba étika profisionál, direitu no devér sira jornalista nian, knaar no devér komunikasaun sosiál, knaar Estadu nian iha setór komunikasaun sosiál no kestaun hirak seluk relevante ba rejime jurídiku atividade jornalístiku nian.

Iha alinea 7 mós hateten, estájiu sei halo iha rejime okupasaun prinsipál, permanente no renumeradu ho pelumenu saláriu mínimu nasionál

Inkompatibilidade

Jornalista, tuir lei komunikasaun sosiál, artigu 17 (Inkompatibilidae ka labele hala’o tan knaar hirak seluk) iha alinea 1 hateten, profisaun nu’udar jornalista labele hala’o hamutuk iha tempu hanesan ho knaar hirak seluk tuirmai;

a.) Funsionáriu públiku; b.) Titulár ba kargu iha órgaun soberania ida, iha órgaun podér lokál ka lideransa komunitária; c.) Dirijente partidu polítiku; d.) Relasaun públika ka asesór ba imprensa, komunikasun no imajen; no e.) Atividade saida de’it ne’ebé ho rohan hodi promove bein ka servisu liuhosi forma publisidade.

Aliena 2 haktuir, saida mak hakerek iha alínea a) númeru liubá sei la aplika ba funsionáriu públiku sira-ne’ebé atu hala’o knaar nu’udar jornalista iha órgaun komunikasaun sosiál Estadu nian.

Iha alinea 3 hateten, bainhira hala’o knaar espesífiku iha nº 1, profisionál ne’e tenke fó filafali títulu rasik identifikasaun ba Konsellu Imprensa hodi impede hala’o atividade jornalístiku.

Alienia 4 ne’e haktuir, hapara impedimentu bainhira de’it hapara situasaun ne’ebé hamosu impedimentu ba, jornalista bele hala’o filafali ninia knaar nu’udar jornalista, bainhira fila-fali atu hola parte iha órgaun komunikasaun sosiál saida-saida de’it.

Iha alinea 5 ne’e esplika, bainhira sakar saida maka hakerek iha númeru 1 sei hetan kastigu ho koima ida hosi $250 to’o $1.000.

Notísia Relevante: Jornalista na’in-100 hatama ona karteira profisionál ba CI

Jornalista : Nelia Fernandes

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here