Membru PNTL husi unidade transitu halao CHECK POINT iha Palacio governu nia oin hodi prende motorista sira neebe halo movimentu ba mai la ho karta kondusaun, Kuarta, (26/5/2021). Imajen Tatoli/ Antonio Goncalves

DILI, 30 dezembru 2021 (TATLI)— Xefe Departementu Tránzitu, Seguransa Rodaviáriu Nasionál, Superintendente Xefe João Belo, informa, hahú hosi fulan-jullu to’o dezembru ne’e, konsege rekolla reseita $56.629 ba kofre Estadu.

“Ita rekolla reseita ne’e ho bazeia ba implementasaun lei númeru 28/2017 kona-ba kontrolu sirkulasaun karreta estrajeiru ne’ebé maka tama iha ita nian territóriu nasionál no polisia tránzitu mós rekolla liuhosi sidadaun kontra kódigu Estrada,” Superintendente Xefe ne’e, hateten ba jornalista sira iha kuartél Jerál PNTL, kinta ne’e.

Tuir dadus kazu asidente tráfegu ka seguransa rodaviáriu ne’ebé akontese hahú janeiru to’o 26 dezembru 2021, hamutuk 1.418, kompostu hosi kanek kamaan 1.528, kanek toda 319, no óbitu 56.

Xefe Departamentu ne’e dehan kompara ho tinan lima ba kotuk ema mate iha estrada hosi na’in-60 to’o na’in-100, maibé iha tinan 2021, deit na’in-20 to’o na’in-56.

“Ita konsege ona reduz númeru fatál ema mate iha estrada no espera tinan oin ita minimiza nafatin asidente fatál iha estrada públiku sira,” João Belo espera.

Alende, Komandante Tránzitu Nasionál haktuir, durante selebrasaun Natál, halo operasaun iha territóriu Timor -Leste  konsege prende karreta governu rua ho motorizada governu tolu.

Operasaun ne’e bazeia ba lei númeru 8/2003, kódigu estrada nian, ne’ebé  Polísia Tránzitu nuudar fiskalizadór hodi kontrola sirkulasaun karreta ho motór governu  nian fora hosi oras servisu no mós sira ne’ebé mak laiha autorizasaun atu uza.

“Karreta no motor sira ne’e agora ami asegura iha ne’e, hein koordenasaun ho parte  Komisaun Anti Koruppusaun (CAC sigla portugés), Patrimoniu Estadu no Diresaun Nasionál Transporte Terrestre (DNTT),  oinsá mak prosesa ba oin hodi entrega ba ministériu ne’ebé maka fó veíkulu ba  pesoál sira uza,” nia haktuir.

Notísia Relevante: Fulan ne’e, PNTL rejista kazu asidente tráfegu 28 no óbitu na’in-lima

Jornalista : Natalino Costa

Editór        : Florencio Miranda Ximenes

PUBLISIDADEiklan

HAKEREK NO HATÁN

Please enter your comment!
Please enter your name here