Primeiru-Ministru, Taur Matan Ruak. Imajen TATOLI/Egas Cristovão

DILI, 30 dezembru 2021 (TATOLI)—Primeiru Ministru (PM), Taur Matan Ruak, kinta ne’e, hala’o sorumutu ho Prezidente Repúblika (PR), Francisco Guterres ‘Lú-Olo’ hodi ko’alia kona-ba kalendáriu eleisaun no preparativu Governu nian hodi realiza eleisaun prezidensiál 2022.

Notísia Relevante: Governu fó opiniaun ba PR kona-ba kalendariu eleisaun prezidensiál

Xefe Governu ne’e hateten, Governu garante katak bainhira Prezidente Repúblika dekreta kalendáriu eleisaun mak Governu prepara kondisaun téknika no lojístika ba eleisaun prezidensiál.

“Governu garante ba Prezidente Repúblika katak bainhira Prezidente Repúblika dekreta ona kalendáriu eleisaun, Governu nia papél mak implementa no prepara kondisaun téknika ho lojístika hotu nune’e eleisaun prezidensial la’o di’ak hanesan eleisaun sira liu-bá ne’ebé ita organiza. Tanba ita-nia instituisaun téknika hanesan CNE no STAE iha funsaun ba ida-ne’e ho preparasaun preparadu atu hala’o eleisaun,” Primeiru-Ministru hateten ba jornalista sira hafoin ramata sorumutu ho Xefe Estadu iha Palásiu Prezidensiál Nicolau Lobato, Bairru Pite, Dili. kinta ne’e.

Enkontru ida-ne’e espesiál ho Prezidente Repúblika liu-liu Xefe Estadu hakarak kontinua rona Governu nia pozisaun kona-ba Eleisaun Prezidensiál iha tinan oin.

PM Taur hateten, sorumutu refere primeiru ko’alia kona-ba data ka loron maibé markasaun ne’e Xefe Estadu nia kompeténsia.

“Entaun ami hanoin kuandu to’o oras Prezidente Repúblika dekreta kalendáriu eleisaun, ita bele hatene realiza iha data saida,” nia hateten.

Notísia Relevante: Prezidente Repúblika sei dekreta kalendáriu eleisaun prezidensiál iha janeiru 2022

Maibé, nia dehan, kualker forma iha 2022 fulan janeiru ba oin Xefe Estadu bele dekreta ona kalendáriu eleisaun no iha fulan-marsu bele hala’o eleisaun.

Jenerál Taur Matan Ruak hateten, dezafiu ida mak Timor-Leste preokupa ba COVID-19 variante Omicron ne’ebé iha nasaun viziñu sira rejista ona no espera labele tama iha Timor-Leste.

“Maibé, ita tenke prepara an. Espera eleisaun mai buat hotu lao di’ak,” Eis Prezidente Repúblika ne’e hateten.

Enkuantu, iha sorumutu ne’e akompaña mós hosi Ministru Administrasaun Estatál (MAE), Miguel Fereira de Carvalho.

Notísia Relevante: CNE-STAE-UNDP diskute preparasaun eleisaun prezidensiál iha vijénsia COVID-19

Jornalista : Nelson de Sousa

Editór       : Cancio Ximenes

PUBLISIDADEiklan

HAKEREK NO HATÁN

Please enter your comment!
Please enter your name here